Дагъустан Республикадин образованидин ва илимдин министерствода 2017-йисан ЕГЭ-рин нетижайриз талукь яз министр Шагьабас Шагьова пресс-конференция тухвана.
Санлай къачурла, министр цIи госэкзаменар кьиле фейи тегьердилай рази тир. Ада вичин ихьтин фикир алатай йисан нетижайриз килигна раижна. Экзаменар вини дережада аваз кьиле тухун патал “Смотри ЕГЭ” махсус портал кардик кутунвай, образованидихъ галаз алакъа авай министерствойри ва ведомствойри саналди кIвалах бажармишнавай. Алава яз министрди къейддайвал, гьар йисуз экзамендиз кIеви истемишунар авурла, кьулухъ галай классра кIелзавай аялриз ва абурун диде-бубайриз къурху жезва. Яни куьмекунрихъ умудар ийизвач, аялдин чирвилерал кIвалахзава ва икI мад.
Пресс-конференциядин сергьятра аваз Ш.Шагьова экзамендай акъудай ученикрин, къайдаяр чIурзавай пунктарин регьберрин кьадар тIимил хьанвайдакайни хабар гана.
— Чун патал виридалайни чIехи агалкьун, аттестатар авачиз амукьай аялрин кьадар тIимил хьун я, — лагьана министрди.
Еке баллар аваз ЕГЭ вахкайбуруз талукь яз министрди къейдна: “Образованидин дережа хкажунин макьсаддалди еке кIвалах ийизва. Адан нетижа яз, эгер алатай йисуз виш балл къачур 12 кас авайтIа, цIи ахьтинбур 15 хьанва. ГьакIни, еке баллар аваз экзаменар вахкайбурун кьадарни кьве агъзурдалай гзаф я. Санлай къачуртIа, 11 предметдай хъсан патахъ дегишвилер хьана. Анжах профильный математикадай гьалар авайвал ама. Алай вахтунда образованидин ери тарифдай гьалда авачир учебный идарайрихъ галаз кIвалахдай муаллимрин десте кIватIнава”.
Пресс-конференциядал учебникрин месэлани къарагъарна.
— Чна аялривай хъсан чирвилер истемишдайла, гьа чирвилер къачудай хъсан шартIарни тешкилун герек я. Гьакъикъатдани, эхиримжи са шумуд йисуз школайра учебникар кьит тир, амма цIинин йисуз, Дагъустандин Кьил Рамазан Абдулатипован куьмекдалди ва “Просвещение” чапханадихъ галаз кутIуннавай икьрардалди, республикадин школаяр кIелунин ва методикадин материалралди таъминарда, — гана министрди.
Журналистри дидед чIалариз талукь месэлани кудна. Санлай къачурла, министрди гьалар хъсанвилихъ дегиш жедайдак ва гележегдани мадни виликди фидайдак умуд кутуна.
Дагъви Шериф
