Мегьарамдхуьруьн райондин администрациядин пресс-къуллугъди хабар гузвайвал, РД-дин МВД-дин ГИБДД-дин ДПС-дин кьилдин батальондин инспектор, полициядин лейтенант Давид Фатаховаз телеф хьайидалай гуьгъуьниз ганвай ВикIегьвилин орден адан багърийрив вахкун патал 28-июлдиз райондиз РД-дин къенепатан крарин министр Абдурашид Мегьамедов атана.
Министрдихъ галаз кьиле фейи гуьруьшда райондин администрациядин аппаратдин къуллугъчийри, хуьрерин кьилери, организацийрин руководителри, къанун-къайда хуьдай органрин, общественный организацийрин, гьакIни массовый информациядин такьатрин векилри иштиракна.
Мярекат ачухай муниципальный райондин кьил Фарид Агьмедова 2016-йисан 15-февралдиз арадал атай бедбахтвилин дуьшуьш рикIел хкана. А чIавуз Дербент районда ГИБДД-дин постунал алаз хьайи Мегьарамдхуьруьн райондин агьали Давид Фатахов телеф хьана. И бедбахтвал арадал атай юкъуз Давида къуллугъдин рекьяй вичин юлдашдихъ галаз санал шак физвай автомобиль акъвазарна, машиндиз килигзавай чIавуз хъиткьинардай шей кардик акатна. Райондин кьили къейд авурвал, Давид Фатахова викIегьвал, уяхвал къалурунин нетижада мадни еке бедбахтвилер арадал гъидай завалдин вилик пад кьаз алакьна.
Гуьруьш кьиле физвай залда Фаридан буба, диде, кайвани ва хвани авай. РД-дин къенепатан крарин министр Абдурашид Мегьамедова, къуллугъдин гражданвилин ва инсанвилин буржи тамамардайла, чанни къурбанд ийиз гьазур ла-йихлу хва тербияламишунай диде-бубадиз сагърай лагьана ва ахпа Давид лайихлу хьанвай ВикIегьвилин орден адан багърийрив вахкана.
Гуьруьшдал рахай муниципальный райондин Общественный палатадин председатель Агъадаш Нагъметуллаева чи обществода къанун-къайда хуьдай органри къугъвазвай ролдикай лагьана.
Давид Фатахова вичин вахтунда кIелай Мегьарамдхуьруьн 1-нумрадин юкьван школадин директор Гьуьруьзат Къадировади Давид Фатахован экуь къамат рикIелай ракъур тийидайди, акьалтзавай несил ватанпересвилин руьгьдаллаз тербияламишунин карда адан кьегьалвал чешне къейдна.
Эхирдай райондин кьил Фарид Агьмедова РД-дин МВД-дин министр Абдурашид Мегьамедоваз райондиз атунай сагърай ла-гьана, ведомстводихъ республикадин, уьлкведин хатасузвал таъминарунин карда гележегдани агалкьунар хьана кIанзавайди малумарна.
«Лезги газет»
