Сулейман-Стальский райондин са шумуд майишатда гад агудунин кIвалахар кьиле физва. Абурун арада лежбервилинни фермервилин “Курхуьр” майишатни ава. И карханадин магьсулдаррин вилик, санлай къачурла, 253 гектардилай виниз никIерай техилар кIватI хъувунин месэла ква. Им, алай девирда комбайнийрикай, кудай шейиникай авай дарвал, техникадин запасдин частарин виниз тир къиметар фикирда кьурла, регьятдиз гьялиз жедай кар туш. ГьакI хьайила, курхуьруьнвияр и месэладив жавабдарвилелди эгечIнава. Гьарда вичин къайгъу виликамаз ийизва, сада-садаз куьмекар гузва, гаф акатдай кас-мас жагъуриз, къерехдайни куьмек желбзава.
Гад агудзавай вахтунда чи жегьилрини активнидаказ куьмекар гуз, гьич тахьайтIа, никIера туькер кьадайла, чпивай жедайвал гъил яргъи ийиз хьанайтIа, хупI хъсан жедай. Абуруз суьрсет гьасилун патал чIугвазвай зегьмет гьихьтинди ятIа чпин вилералди аквадай, фан къадирни жедай. Амма им жегьилар хуьруьн майишатдин кIвалахрал ерли машгъул жезвач лагьай чIал туш.
Гьелелиг, санлай къачурла, 114 гектардай техилрин бегьер кIватIнава. Лагьана кIанда, жегьил арендаторар тир Къудрата, Арсена, Марсела, Маллабубади, Арчана чпин участокрай (45 гектар) техил кIватIна куьтягьнава. Гад агудунив сифте эгечIай Таибов Тагьирмирзедини 7 гадай бегьер вахчунва, 30 гектар гьеле вилик кума.
Гьар са гектардай, цик квачир чкаяр ятIани, 16-17 центнердилай тIимил тушиз михьи техил хьанва. Алай вахтунда техилар кIватIунин кIвалах тежрибалу механизатор ва магьсулдар Шайдаев Сефербеган майишатдани кьиле физва. Ада вичив гвай 53 гадикай 40 гектардай риге галачир къуьлуьн бегьер кIватIнава ва и кIвалах давам жезва.
Жавабдар и карда Курхуьруьн магьсулдарриз куьмек гун патал Агъа-СтIалдилай атанвай Абдулкъадиров Артура ва адан куьмекчи Агьмедов Ифрата, чимивилизни килиг тавуна, акъваз тийиз зегьмет чIугвазва. Лагьана кIанда хьи, пакамлай нянин геждалди никIе къекъвезвай комбайн акурла рикIик шадвал акатзава. Гъиле авай участокдай мукьвара техил кIватIна куьтягьдайвал я. Ахпа Артурани Ифрата нубатда акъвазнавай Нариманан, Тарланан, Велиметан ва Мусаибан участокрай техил кIватI хъийиз куьмек гуда. Вичин участокда кIвалах куьтягьайла комбайндин штурвалдихъ Сефербегни ацукьда ва кIвалах мадни йигиндаказ еримлу жеда. Вилик лагьайтIа, гьеле 139 гектар техилдин никIер кума. Бегьер пучвилер авачиз кIватIун патал магьсулдарри алахьай гьар са йикъакай тамамвилелди менфят къачузва ва лап мичIи жедалди кIвалах акъвазарзавач.
Гьелбетда, шофердин куьмек галачиз гад агудунин кIвалах фикирдиз гъун четин я. И важиблу кар 15 йисан тежриба авай шофер Эмирханов Равидина хиве кьунва. Ада комбайнди кIватIзавай къуьл, йикъа 5-6 рейс ийиз, вичин машиндаваз хутахзава.
Райсудин Набиев
