Гьар йисан эхиримжи варцара “Лезги газетдин” чинриз ам кхьинин патахъай теклифар, веревирдер, макъалаяр акъатзава. Им халкьдин рикIелай газет алатнава лагьай гаф туш. Ана, заз чидайвал, кьве месэла ава: газетдин къимет йисалай-суз дегиш хьун ва ам бязи чкайра агьалийрив вахтунда агакь тавун. Бязи вахтара газет 3-4 йикъан геж хьайила, жувни сабурсуз фикиррик акатзава. Чун саки вири савадлу инсанар ятIани, кьве кIвалах чна рикIелай алудзава. Сад лагьайди, къалурнавай умуми къимет 854 манатни 76 кепек ятIани, адан саки кьудай пуд пай “Почта России” ФГУП-дин киседиз физва. Кьвед лагьайди, газетдихъ, чкайрал атана, почтальонрин месэла гьялдай мумкинвал авач. Асул гьисабдай, им газетдин хиве авай везифа туш. Почтальонрин месэлаяр почтади гьялна кIанзава. И делилар фикирда кьуналди, редакция чи районра киоскар эцигунин гьерекатрик ква.
Кьилин редактор Мегьамед Ибрагьимова газетдин 44-нумрадиз акъатай “Жуван пайни кутур” макъалада гузвай теклифар, къалурзавай рекьер халкь паталди къулайвилин ва регьятвилин замин я. Хизандин такьатриз килигна, гьар садавай лазим тир жуьре хкягъиз жезва.
Газет кхьин лагьайла, чаз чна ам вучиз кхьизватIа, ам вуч ятIа, ада чаз вуч гузватIа, ада вичин хивез гьихьтин пар къачузватIа, сифтени-сифте гьам чир хьана кIанда. Кьилинди, чна газет халкьдин адвокат язни фикирда кьун герек я. Редакциядиз агьалийрилай суалар, тIалабунар тIимил къвезвач. Абур чирун ва арзачидиз дуьздаказ жаваб гун патал редакциядин векилар министерствойрани ведомствойрин кабинетра тIимил къекъвезвач, гьикI хьи, абуру халкьдин вилик жавабдарвал гьиссзава, ватанэгьлийрин къайгъуяр рикIик кьазва. Уьмуьрдикай ийизвай М.Жалилован веревирдер, яшайишдин гзаф терефар къалурзавай макъалаяр инсандин руьгь паталди тIимил менфятлубур туш. К.Къалажухвиди сиясатдикай гузвай баянар, ял ядай декьикьайра чпикай менфят къачузвай кроссвордар, гьар жуьре баянар гузвай уьмуьрдин шикилар ва амай авторрин макъалаярни чавай тIимил итижлубур я лугьуз жедач. Са гуфуналди, газетдин руьгьдин сергьятар лап гегьенш я.
Чи бязи районра халкьдиз регьят хьун патал “Дагпечатдин” киоскар кардик кутунин месэла алатай йисарани къарагъарнавай. Са вуч ятIани ийиз алакьна, и кар давамарайтIа мадни хъсан я. Зун яргъал фидач. Гьа чи патав гвай Белиждани киоск эцигун лап хъсан жедай. Патарив гвай хуьрерай гзафбуру ана кIвалахзава эхир. Нуьгдуьдин, Белиж хуьруьн, Фиригърин, ЛукIарин, Агълабрин агьалийрив гьафтеда садра газетар агакьарун зегьмет алай кар жедачир. Ахьтин везифа за, и макъаладин авторди, жуван хивез къачузва. Фиригърин агьалийрив гьар гьафтеда хайи газет ахгакьардайдини хиве кьазва. ГьикI хьи, и кар газетдин уьмуьрдик, кIвалахдик жуван пай ва къуьн кутур месэла жезва.
Пайна на
Зур виш йис я чун таниш яз,
Зи мукьвадаз элкъвенва вун.
И йисара, асайиш яз,
Зи сегьерра къекъвенва вун.
АкI захъ галаз,
Вун гъилеваз,
Фуни шадвал,
Пер пайна на,
Югъ атана
Халкьдин аваз,
Илгьамлу тир
Хъвер пайна на.
Къени зун чи гъавурдава,
КIеви гьиссер гадар жедач.
Мални-меслят сад тавуна,
Чун такварбур шадар жедач.
Къуй чир хьурай
Гьар инсандиз:
Заз сефердин
Рагъ пайна на,
Къати иштягь
Гваз хъсандиз,
Адетраллай
Рекь пайна на,
Лезги чIалан къайгъуда вун
Аваз, къени майдандалла.
Заз аквазва. Мад вуч лугьун?
Вири тек са ви чандалла.
Пай кутада,
Кутада къуьн:
На виликан
Ад квадардач.
Къе ава чун
Къуьневаз къуьн,
Халкьдин руьгьдин
Чад квадардач.
“Лезги газет”, четин чIавуз
Лезги халкьдин гъил кьазва на.
Регьят хьурай халкьдиз лугьуз,
Четин кардин кьил кьазва на.
Шарвилидиз
Элкъвезва вун.
Туруналлай
Нур пайна на,
Чилин гьиссдал
Элкъвезва вун,
Халкьдиз кузвай
Хур пайна на.
Абдул Ашурагъаев
