Алай йисни акуна-такуна акъатзава. Са варз ама. 2019-йис патал газет-журнал кхьидай вахтни алукьнава. Им жуван медениятдихъ ялварзавай гьар са ватанэгьлиди хайи чIалал акъатзавай изданияр патал къайгъударвална кIанзавай вахт я. Сифтени-сифте жува газет-журнал кхьиналди.
Подпискадин кIвалах Кьурагь райондин Гелхенрин хуьре гьикI кьиле физва? Зун сифте хуьруьн администрациядиз рекье гьатна.
— Райондин руководстводин патайни чаз газетар, журналар кхьинин тапшуругъ-тIалабун ава, — лагьана администрациядин кьил Умалат Гьайдарова. — Хуьре авай идарайрин чIехибур санал кIватIна, абуруз чна подпискадин патахъай тапшуругъ ганва. И кар чи идарадин къуллугъчийрилай гатIунна.
Школадиз фейила, анин директордин жавабни рикIик шадвал кутадайди хьана. “Муаллимрини, техработникрини вирида “Лезги газет”, ройондин “Дагъдин булах” кхьенва”, — лагьана ада.
Подпискадин кIвалах кьиле тухузвай алакъадин отеленидални кьил чIугун кьетIна за. Анин начальник Гьусейнов Агъаширина лагьай гафари зак лувар кутуна: “Хейлинбуру газетар, журналар кхьенва. Кхьидайбур мадни ама. Куь-релди, “Лезги газет”, “Дагъдин булах” ва маса изданиярни кхьин тавур кIвал хуьре амукьдач. КIел-кхьин чин тийидай кас чи хуьре авач, я лезги чIал кваз кьан тийизвайдини”, — алава хъувуна ада.
Яшамишрай зи хуьруьнвияр, дидед чIалан къадир авай. Чпин меденивал къуй мадни артух хьурай! Сагърай ватанпересвал квай къуллугъчиярни!
Сейфудин Шагьпазов
