28-ноябрдиз Мегьарамдхуьруьн райондин кьил Фарид Агьмедова хсуси месэлайрин патахъай агьалияр кьабулна. И гьакъиндай «Лезги газетдиз» райадминистрацияди хабар гузва. Нубатдин сеферда райондин кьили 11 агьалидин дердийрихъ яб акална. Гьамиша хьиз, и сефердани агьалийри райондин кьиливай гзафни-гзаф кIвалахдал тайинарунин, чилер ишлемишунин ва чилерихъ галаз алакъалу гьуьжет алай месэйрин патахъай куьмек тIалабна. Идалайни гъейри, набут агьалийриз яшайишдин шартIар хъсанарунин месэлани къарагъарна.

Бязи активный агьалийри райондин общественный уьмуьрда иштиракуниз чеб гьазур тирдакайни лагьана. Райондин кьили гьар са агьалидиз дикъетдивди яб гана, абуру малумарай месэлаяр хъсандиз чирна. Куьлуь-шуьлуь месэлаяр чкадал гьялна, амма муькуь месэлаяр бажармишун патал райадминистрациядин жавабдар ксариз тапшуругъар гана. Вири месэлаяр Ф.Агьмедова вичин гуьзчивилик кутуна.

Къейд ийин, агьалияр кьабулунин серенжемда МР-дин депутатрин Собранидин председатель Н.Алиярова, общественный хатасузвилин рекьяй райондин кьилин заместитель И.Исабегова, райондин кьилин заместителар тир А.Гьажиева, М.Абдуллаевади ва райондин отделрин жавабдар къуллугъчийри иштиракна.

«Лезги газет»