РФ-дин Гьукуматди Дагъустан Республикадин школайра кIелзавай аялар умуми образованидин кьилин программайрай учебникралди таъминарун патал резервдин фондунай 607 миллион манатдилай виниз пул чара авунва. Талукь буйругъдикай, РФ-дин Гьукуматдин Председатель Дмитрий Медведеван къул алаз, интернет-порталдин официальный сайтда хабар гузва.
“Россиядин Федерациядин “Образование вилик тухун” госпрограмма кьилиз акъудун яз, федеральный бюджетдай умуми образованидин школайра кIелзавай аялар умуми образованидин кьилин программайрай учебникралди таъминарун патал Дагъустандиз 607 миллионни 977 агъзур манат пул чара авунва”, — кхьенва ана.
Документдал асаслу яз, и кьадар пул Дагъустандиз 2018-йисуз 2 миллионни 221 агъзурни 701 учебник къачун патал чара ийизва.
Виликдай ТАСС-ди хабар гайивал, 29-августдиз Россиядин премьер-министр Дмитрий Медведева кьиле тухвай кIелунин цIийи йисаз гьазурлухвилиз талукь совещанидал просвещенидин министр Ольга Васильевади Россиядин кьве региондивай-Новгороддин областдивайни Дагъустандивай школаяр учебникралди 100 процентдин таъминариз тахьанвайдакай хабар ганай.
Чи мухбир
