2018-йисан 10 вацра Дагъустанда налогрилай ва кIватIзавай маса взносрилай къвезвай къазанжийрин кьадар 2,1 миллиард манатдин артух хьанва. Идакай саласа юкъуз Россиядин ФНС-дин РД-да авай Управленидин кьил Гъазинур Апсалямова хабар гана.
“Алай йисан 10 вацра налогар яз атун гуьзлемишзавай къазанжияр бюджетдин ва бюджетдилай къерехдай тир вири фондарив тамамдаказ агакьнава. 2017-йисан январь-октябрь варцарин нетижайрив гекъигайла, цIи налогрилай ва кIватIзавай маса взносрилай къвезвай къазанжийрин кьадар 7,7 процентдин ва я 2,1 миллиард манатдин артух хьанва, гьа жергедай яз республикадин умуми бюджетдиз къвезвайбур — 5,9 процентдин, яни — 1,2 миллиард манатдин”, — лагьана Апсалямова.
“Яшайишдин рекьяй чарасуз яз страховатун патал агакьнавай взносрин кьадар 2018-йисан январь-октябрь варцара 18,1 миллиард манатдиз барабар хьанва. Им, шазан гьа и вахтунин кьадардив гекъигайла, 17,7 процентдин ва я 2,7 миллиард манатдин виниз тир делил я. Планда къалурнавай тапшуругъ 111 процентдин тамамарнава”, — малумарна идарадин кьили.
Адан гафаралди, Дагъустандин умуми бюджетдиз 2018-йисан 10 вацра 21,4 миллиард манат атанва, бюджетдин тайинарунар (назначения) 3,9 процентдин ва я 805,6 миллион манатдин артух яз тамамарнава.
“Дагъустандин умуми бюджетдиз атанвай такьатрикай республикадин бюджетдив 15,5 миллиард манат, чкадин бюджетрив — 5,9 миллиард манат агакьнава”, — къейдна Апсалямова.
ФНС-дин регионда авай Управленидин руководителди алава хъувурвал, алай йисан 10 вацран вахтунда НДФЛ-дай гузвай пуларин кьадар 13,7 процентдин ва я 1,3 миллиард манатдин артух хьанва.
«Лезги газет»
