27-ноябрдиз Махачкъалада Дагъустандин Хатасузвилин советдин заседание кьиле фена. Анал Дагъустандин тIебиатдин ресурсрин ва экологиядин министр Набиюла Къарачаева Дербент шегьер целди таъминарунихъ галаз алакъалу месэла гьялдай рехъ жагъанвайдакай малумарна.
“Чна проектдинни сметадин документар гьазурнава ва экспертизади разивал ганвай чар вахчунва. Заз ихьтин важиблу кар раиж ийиз кIанзава: Сулейман-Стальский райондин Шур-дереда авай цин гьамбарханадин гьазурвал 95 процентдин дережада ава. Цин и гьамбарханади республикадин кьиблепатан вири зона, гьа гьисабдай яз Дербентни целди таъминарунин месэла гьялдай мумкинвал гуда. Владимир Абдуалиевич, за квевай и месэла гуьзчивилик кутун тIалабзава”, — малумарна министрди.
Вичин нубатдай яз, Дагъустандин Кьил Владимир Васильева проектдин тереф хуьн хиве кьуна. “Михьи яд гражданрин хатасузвилихъ галаз сихдаказ алакъада ава. И проект чи кьетIен гуьзчивилик жеда”, — къейдна В.Васильева.
Лагьана кIанда хьи, эхиримжи йисара Дербент Самурдин тамай къачудай целди таъминарунин проектдиз килигиз хьанай, чкадин агьалияр и кардиз акси тир.
«Лезги газет»
