Гьар йисуз Сулейман-Стальский районда республикадин дережада аваз кьиле тухузвай манидин «Куьредин ярар» фестиваль цIи Дагъустандин эдебиятдин классик Етим Эминан 180 йисан юбилейдин сергьятра аваз тешкилнавай. Мярекатдин кьилин макьсад Кьиблепатан Дагъустандин халкьарин меденият хуьникай ва вилик тухуникай, абуруз яратмишунрин рекьяй виликди фидай мумкинвилер тешкилуникай, ватанпересвилин гьиссер мягькемаруникай ибарат я.

Фестивалда иштиракун патал и юкъуз­ чIехи шаир СтIал Сулейманан тIвару­нихъ галай райондиз РД-дин ЮТО-дин 12 муни­ципалитетдай делегацияр мугьман хьан­вай. Иштиракчийрин арада Сулейман-Стальский райондин кьил Нариман Абдулмуталибов, райондин депутатрин соб­ра­ни­дин председатель Штибег Мегьа­медха­нов, “Лезги газетдин” кьилин редактор Ме­гьамед Ибрагьимов, Лезги театрдин ди­рек­тор Динара Эминова, театрдин кьилин режиссер Мирзебег Мирзебегов, Да­гъу­с­тан­дин халкьдин писатель Абдуселим Исмаи­лов, хуьрерин администрацийрин кьилер, мектебрин муаллимар, шаирарни гьикаятчияр, милли манидални Етим Эминан яратмишунрал рикI алай инсанар авай.

Шадвилер Эминхуьре Етим Эминан гуьмбетдал цуьквер эцигунилай гатIунна. Анал кьиле фейи мярекатдин сергьятра аваз, Нариман Абдулмуталибова Етим Эминан яратмишунри Дагъларин уьлкведин эдебиятдин алемда кьунвай чка, шаирдин эсеррин кьетIенвилер къейдна. Эминхуьруьн юкьван мектебдин ученик Эмирхан Айдаева, Дагъустандин эдебиятдин классикдиз бахшна, вичи кхьенвай шиир кIелна.

Гуьгъуьнлай суварин иштиракчияр Кьасумхуьрел, И.Тагьирован тIварунихъ галай культурадин дворецдиз, хтана. Дараматдин фойеда Етим Эминан уьмуьрдиз, шииратдиз талукь яз райондин яратмишунрин мектебдини аялрин яратмишунрин КIвали гьазурнавай выставкайри мугьманрин фикир чпел желбзавай.

Зал тамамдиз ацIанва. Сегьнедиз мярекат кьиле тухузвай Ярагьмед Ярагьмедов экъечIзава. Ада Етим Эминан 180 йи­сан юбилейдихъ галаз алакъалу яз Су­лей­ман-Стальский райондин агьалийрин тIвар­цIел РФ-дин Госдумадин депутат Гьажимет­ Сафаралиева ва РД-дин Халкьдин Собранидин депутат Гьамидуллагь Мегьамедова рекье тунвай тебрикдин телер кIелна.

Гуьгъуьнлай иштиракчийрин вилик Нариман Абдулмуталибов экъечIна. Ада алай йисуз Етим Эминан 180 йисан юбилейдин сергьятра аваз кьиле тухузвай фестивалдихъ милли меденият хуьнин ва вилик тухунин жигьетдай авай важиблувиликай лагьана. “ЦIинин йис кьетIенди я. Сулейман-Стальский районда ам Етим Эминан йис яз малумарнавай. Эмин чIехи шаир, арифдар я. Ада гьа са вахтунда вич яшамиш хьайи девирдихъни эбедивилихъ элкъуьрнавай цIийи милли шиират арадал гъана. Ада вичин яратмишунра тарихдин лайихлувилерни  XIX лагьай асирдин бедбахтвилер гьакъикъи шикилда туна къалурна. Шаирдин яратмишунриз, адан гуьзел жавагьирриз Россиядин, Дагъустандин гзаф критикри еке къимет ганва, лезги шаирди Дагъларин уьлкведин шииратдин культурадик кутунвай лайихлу пай къейднава. Етим Эминан эсеррихъ чи йикъарани еке метлеб ава. Адан яратмишунрин ирсина гележегдин несилар патални уьмуьрдин хейлин тарсар ава. Къе чна Эминан йисан нетижаяр кьазва. Заз вири мярекатра активнидаказ иштиракай райондин мектебрин, ясли-бахчайрин, хуьрерин культурадин маканрин, музыкадинни яратмишунрин мектебрин, библиотекайрин къурулушдин коллективриз сагърай лугьуз кIанзава. И крар чна Етим Эминан яратмишунар хуьнин ва гележегдин несилрални агакьарунин макьсаддалди ийизва”, — къейдна райондин кьили.

Етим Эминан йисан сергьятра аваз На­риман Абдулмуталибова шаирдин ярат­мишунриз талукьарна кьиле тухвай жуьреба-жуьре конкурсра гъалиб хьайи­бурув — Курхуьруьн 1-нумрадин мектебда кIел­за­вай Эмиля Рустамовадивни Эр­лан Межидовав, Цмуррин мектебдин ученица Сан­жа Нуралиевадив — чухса­гъул­дин чарар вахкана. Ихьтин чарариз гьакIни “Лезги газетдин” редакциядин, Кьасумхуьрел алай Россиядин халкьарин адетдин культурадин центрадин, Эминхуьруьн ва Вини СтIалрин юкьван мектебрин коллективарни лайихлу хьана­.

Мярекатдин сергьятра аваз райондин администрациядин патай меценат Эмирбег Ама­хановав Гьуьрметдин грамота вахкана. Гаф кватай чкадал лугьун хьи, ада Эминхуьре Етим Эминан кIвал-музей эцигун вичин хивез къачунва.

Гуьгъуьнлай сегьне фестивалдин кьилин игитрин ихтиярда туна. Яратмишдайбурун коллективри ва кьилдин манидарри вижевай концерт гана. ­Абурун арада кьуьлердайбурун “Куьре” ­ансамбль, “Ватан” ВИА, ашукьрин “Шарви­ли” ансам­бль, РД-дин халкьдин артист­ка­ Фари­зат Зейналова, РД-дин лайихлу артистар — Омар Меликов, Эльмира Къараханова, РД-дин культурадин лайихлу работник Гуь­руь Рагьманова, милли ма­нияр лу­гьуз­­­вай Седа­къет Саидова, Керим Камилов, ашукь Айдун, Аминат Алие­в­а, Расул­ Аб­дул­кебиров, Рита Абдурагьманова, Фа­ри­зат Ремиева, Мадина Муртузалиева, И.Тагьирован тIва­ру­нихъ галай культурадин дворецдин артистар, Сулейман-Стальский райондин музыкадин мектебра чирвилер къачузвай аялар ва масабур авай.

“Куьредин ярар” фестивалдин сергьятра аваз манияр лезги, табасаран, агъул, рутул ва маса чIаларал тамамарна. Манидарар ва яратмишдайбурун коллективар РД-дин культурадин министерстводин патай дипломриз ва сав­кьат­риз лайихлу хьана.

Агьмед Магьмудов