Ватандин ЧIехи дяведин иштиракчи Лукьман Батманован хендеда, Россиядин Федерациядин Игит Зейнудин Батманован диде Султанхалум Азизовна Батмановадиз Дагъустандин Кьил Владимир Васильеван Указдалди Амет-Хан Султанан тIварунихъ галай “Жегьилриз ватанпересвилин тербия гуник лайихлу пай кутунай” медаль ганва.
Къейд ийин хьи, яшар 90 йисарилай алатнавай Султанхалум Азизовна Кьурагь райондин КIирийрин хуьре яшамиш жезва. Дяведин йисара ада хейлин маса дишегьлийрихъ галаз санал окопар эгъуьнна, душмандин винел гъалибвал къачуник вичин пайни кутуна. Гзаф азиятризни четинвилериз дурум гайи Султанхалум дидеди ругуд велед халис инсанпересар, ватанпересар яз тербияламишна. Баркалла!
Чи мухбир
