Эхиримжи вахтара телевиденидин чIехи пай каналрай къалурзавай, обществодин къанажагъдиз чIурукIа таъсирзавай, килигзавайбурун рикIер къарсурдай передачайрикай “ЛГ”-дин 44-нумрада Мердали Жалилова кхьенвай “Вуч паталди къалур­за­ватIа?.. макъалада веревирдер авунва. Зун автордин фикиррихъ галаз  рази я.

Ада кхьизвайвал, “…гьи канал кутуртIани, аквазвайбур асул гьисабдай угърашвилерни курвилер, чукIурунарни цIаяр кьунар, шу­муда шумуд яна, кIур гана кьенатIа, гьикI ахпа гелер чуьнуьхиз алахъзаватIа, гьа те­рефар я”. Публицистди кIелзавайдавай гьахълудаказ хабар кьазва: “Герек яни ихьтин шейэриз килигун? КилигайтIани, вуч чирзава? Вучтин тербия къачузва?” Месела, 1-каналдин “Къуй рахурай!” передачада са шумуд­ юкъуз къалурай манидар Прохор Шаляпин ва адан са паб Анна Калашникова аквазвай жегьилри гьихьтин тербия къачурай?!. Итимди са шумуд дишегьли, кьуьзуь-жегьил талгьана, гъиз рахкурна. Папа ла­гьайтIа, маса итимдилай аял хазва. Гъизвай свас михьиди, чал­кечирвал квачирди хьун хъсан хизан арадал атунин заминвал я. Бес чи “гъетерин” ахлакьди хизан­дин бинейриз кIур гузвач­ни?! Аламатдин кар ам я хьи, са кIусни регъуьвал ква­чиз, абуру гуьгъуьнин йикъара и передачада масабуруз баянар гузва­.

Ихьтин мисалар яшайишдин вири рекьерай гъиз  жеда, иллаки — гзаф  пичIи хьанвай нефсерикай. Къизилдин тапанчияр, къимет 35 миллион ма­нат тир кхьинардай ручка, 60 миллион манатдай-кIвалин къенепатан ракIар ва икI мад. Ихьтин крар акваз, “сада-садан гъил кьун, инсандиз хас ерияр” рикIелай алатзава. Журналистдин кьилин суалдиз “Вуч паталди къалурзаватIа?..” жаваб деринра ава. Гзаф пай СМИ-яр чпин дибдай ал­­вердин проектар я, абурун асул метлебни —  къазанжи къазанмишун. Ша чна и кар рикIелай ракъур тийин. Передачайризни хъсанбуруз, хийирлубуруз килигин!

Гьасан Гьуьсейнов