Мектебда кIелдай йисара вичихъ галаз са классда авай таяр-туьшери институтриз, университетриз, техникумриз финикай ихтилатар ийидайла, Саидина абурухъ дикъетдивди яб акалдай. Ада юлдашриз вичин мурад халкьдиз фу гудай кеспидин иеси хьун тирдакай лугьудай. РикIе авай мурад ада кьилизни акъудна. Мектеб куьтягьайла, ада Махачкъалада ашпазвилин курсара кIелна, 4-разряддин пешекарвал къачуна. Зегьметдин рехъ Саидина Махачкъаладин портуна кIвалахунилай башламишна. Ина ада 5 йисуз зегьмет чIугуна. Гимидин шартIара вахт-вахтунда дадлу хуьрекар гьазурун регьят кар туширтIани, ада вичин хиве авай везифаяр намуслувилелди кьилиз акъудна. Дадлу, жуьреба-жуьре чи милли хуьрекрилай гимидин персоналди разивал ийиз, адаз чухсагъул лугьуз хьана.
Са кьадар вахт алатайла, Саидин Махачкъала шегьердиз хтана. Дахадаеван куьчеда авай са столовойда ам чIехи ашпазвиле кьабулна. Хъсан тежрибани хьанвай ада гьазуриз хьайи дадлу хуьрекар вишералди, агъзурралди инсанри дадмишна. Халис устад яз, Саидинан тIвар и патара раиж хьана. Адакай столовойдин махсус ктабда шумудни са сеферда разивилин келимаяр кхьена.
Гуьгъуьнлай, хайи КIварчагъиз хтайла, С.Гьуьсейнов “Коммуна” совхоздин столовойда кIвалахал акъвазна. Ина тежрибалу ашпазди вичин пешедал кьарувал мадни хъсандиз субутна. Хуьруьнвийри, танишри низ чида адан гъилелай гьикьван хуьрекар дадмишнатIа! Иллаки гатунни зулун кIвалахрин къизгъин вахтара КIварчагърин хуьруьз республикадин вузрайни техникумрай вишералди студентар куьмекар гуз къведай. КIвалахдин план-график ина мадни жавабдарди хьана. Вичин намуслу зегьметдалди Саидина вири рази жедайвалдай. Адал хайи хуьре хьиз, КIварчагъ дередин амай хуьрерани мехъеррин ашпазвал авун ихтибарзавай.
Герек вахтара ада суварризни хуьрекар гьазурзава, лазим чкайрал агакьариз куьмекзава. И йикъара Кьасумхуьрел кьиле фейи гамаринни халичайрин суварик КIварчагъ дередиз чара авур майдан хъсанди яз гьисабна, ам хуьрекрихъ галаз санал маса затIаралдини безетмишнавай. И кардик Саидинан пайни ква. Ам маса суваррикни активный иштиракчи я. Саидин Гьуьсейнова шиирарни теснифзава, герек чIавуз абур манидалди лугьунни ийизва. Ам хуьруьн художественный самодеятельностдин дестедин активный иштиракчини я. Тежрибалу ашпаз, общественник Саидин Гьуьсейноваз гьуьрметдин грамотаяр, дипломар, знакарни ганва. Хуьре ам сейли, виридаз гьуьрметлу кас я. Чаз адахъ вичин рикI алай пешедал яргъал йисара машгъул жедай къуватар мадни хьана кIанзава.
Райсудин Набиев
