Ингье гъилевай йисни эхирдиз мукьва жезва. Чна, газет кIелзавайбуру, 2019-йис патал “Лезги газет” кхьин-цIийи йисуз еке савкьат яз гьисабиз жеда. Лезги гьар са хизанда, дидед чIалаз гьуьрмет авунин лишан яз, “Лезги газет” вахтунда кхьейтIа, хъсан жеда.
Газет гьина ва гьикI кхьидатIа, адан кьилин редактор Мегьамед Ибрагьимова, Сулейман-Стальский райондин телевиденидай мукьвара рахайла, лагьана, вичин фикирар ва меслятарни раижна. Мадни, “Лезги газетдин” 1-ноябрдиз чапдай акъатай 44-нумрада и месэладикай генани ачухдиз кхьенва. ИкI, газет кхьидай пуд-кьуд рехъ къалурнава. Мад вуч кIанда кьван! “Лезги газетдин” уьмуьрда хьанвай бязи цIийивилер, адакай менфят къачуз жедай рекьерни ачухнава. Мисал яз, онлайн-подписка, Интернетда хсуси сайт кардик кутун -ибурни газет кIелзавайбур патал хъсан муштулухар я. Бязи чкайра, кьилди къачуртIа, шазалай чи районда (ноябрдин юкьварилай Мегьарамдхуьрени) “Дагпечатдин” киоск ачухун шад жедай кар я. И цIийивили районэгьлийриз газет хейлин ужуз къиметдай кхьидай ва идахъ галаз сад хьиз газет кхьизвайбурун кьадарни артухардай мумкинвал ганва.
Алай вахтунда и киоскда вичихъ махсус чирвилер, ахлакь авай Ханова Заиради (шикилда) кIвалахзава. И йикъара чун Заирадихъ галаз таниш хьана ва кIвалахдикай суьгьбет авун тIалабна. Малум хьайивал, киоск ачухунилай агьалияр гзаф рази я. И кардикай хабар авайбур чеб къвезва, газет ина кхьизва. Виридан рикIел алайдини “Лезги газет” я. Са куьруь вахтунда газетдин 48 экземпляр кхьенва. Райондин жегьилрин парламентдин къуллугъчи Алиев Мегьамед, больницадин духтур Къазанбегова Сижарат сифтегьан подписчикар я.
Киоск инсанар гзаф жезвай “Терсепул” базардин патав гва. Ам, гьяд югъ квачиз, амай вири йикъара ачух я. Подписчикар инай газет кхьин тестикьарзавай квитанциярни гваз хъфизва. Им, гьелбетда, еке къулайвал я. Заиради вичин къуншияр, танишар, дуст рушарни “Лезги газет”, гьакI маса изданиярни вахтунда кхьин патал гъавурдик кутазва. Гьар са кардиз вичин тайин ва кутугай вахт ава. Исятда подпискадин вахт я. ГьакI хьайила, садни къерехда акъвазна кIандач. Ахпадални пакадал вегьемир.
Лугьун хьи, ни “Лезги газет” кхьизватIа, гьадаз хайи халкьни, дидед чIални, чи эдебиятни, шаксуз, кIанзава ва багьа я. Ша чна, гьуьрметлубур, и важиблу кардик вирида къуьн кутан!
Райсудин Набиев
