Алай варз — раби-уль-авваль —  мусурманрин календарда лап важиблубурукай сад я, вучиз лагьайтIа и вацра Аллагьдин эхиримжи пайгъамбар Мегьамед (с.а.с.) дуьньядиз атана.

15-ноябрдиз Ахцегь райондин Хуьруьгрин хуьруьн цIийиз туькIуьр хъувунвай клубда диндин зурба межлис-мавлид кьиле фена. РД-дин  Муфтиятдин гуьзчивилик кваз тешкилай и мярекатда, чкадин агьалийрилай гъейри, Кьиблепатан Дагъустандин районрин имамри ва алимри иштиракна. Мярекатдин безек, лагьайтIа жеда, Мегьамед  пайгъамбардин (с.а.с.)  несилдикай тир гьакъикъи неве, Арабистандин Мекка шегьердай атанвай алим Халид Агьмад Гьасани хьана.

Межлис дуьа кIелуналди, Мегьарамдхуьруьн районда РД-дин Муфтиятдин векил Шамил гьажи Рагьманова ачухна ва кьилени тухвана. Хуьруьгвиярни мугьманар тебрикун патал ада сифте гаф хуьруьн имам Юзбег гьажи Ширинбеговаз гана. Ахпа трибунадихъ Кьиблепатан Да­гъус­танда РД-дин Муфтий, шейх Агьмад эфендидин куьмекчи, ахцегь­ви жегьил алим Гьуьснуьдин Ашуралиеваз теклифна.

— Дуьньядал  азандин  ван  алачир,  яни  Мегьамед  Пайгъамбар­дин ­(с.а.с.) сейли тIвар такьазвай са легьзени авач. США-дин машгьур астрофизик Майкл Хартан “100 самых влиятельных людей в истории человечества” ктабда сифте чкадал мусурманрин пайгъамбар Мегьамед ала,  — ада пайгъамбардин къени къилихрикайни уьмуьрдин рекьи­кай маракьлу суьгьбетна.

Рахунрин арада мавлиддин дуьаярни назмаяр кIелзавай. Пайгъам­бардин тарифзавай нубатдин назмадилай кьулухъ гаф адан  30-не­силрикай тир неве алим Халид Агьмад Гьасанидиз гана. Араб чIа­лалди тир адан ихтилат межлисдин мирзевалзавай Шамил гьажи Рагь­манова таржума ийизвай.

— Аллагь-Таалади Мегьамед Пайгъамбар (с.а.с.)  чилел вири­да­лайни хъсан, гуьрчег, гьуьрметлу, кесерлу кас яз халкьна ва чаз михьи, хийир­лу дин гваз ракъурна. Адан девирда арабрин халкь пара авам тир: къе­непатан дявейрани къаришугъвилера сада-сад рекьизвай, жезвай ру­шар (руш  хьун итимдин зайифвал яз гьисабзавай) чан аламаз кучук­за­вай. Гьар са инсанди, тайифади яшайишдин шейэрикай чпиз гуя ал­ла­гьар тукIуьриз, абуруз ибадат ийизвай ва икI мад. Мегьамед Пайгъамбар­ди  вири и татугайвилерал эхир эцигна. Адан таъсирлу гафарихъ, пак амалрихъни крарихъ инсанар инанмиш хьана, гуьгъуьнаваз фена.

Къе дуьньядал са миллиарддилай гзаф мусурманар яша­миш­ жезва ва абурун кьадар къвердавай артух жезва. Чи Пай­гъам­бардихъ (с.а.с.) , гьахълувилихъ, насигьатрихъни весиятрихъ инанмиш ксар Ам рикIин сид­кьи­дай пара кIанзавай ва чпин хъсан краралдини амалралди масадаз хийир­ гуз алахъзавай муъминар я. Пайгъамбар (с.а.с.) “кIан хьунин, адан рекьяй­ финин виридалайни еке суваб” Ла илагьа иллалагь лугьун­ я ва виридалайни гъве­чIиди — рекьелай са къван алудун. Инсанрин па­ра гъалатIар абурун­ авамвиляй, чирвилер, илим тахьунивай я. Алимдин илим — им Пайгъамбардилай (с.а.с.) къвезвай илим я. Ам Интернетдай, я ктабрайни чириз же­дач, алимдин сивяй къачуна кIанда… — камаллу вяз-суьгьбет авуна ада.

— Меккадай Хуьруьгиз, 2400 километрдин мензилдиз, Мегьамед Пайгъамбардин  неве атун, шаксуз, чIехи бахт, хуьруьн берекат я, — лагьана Кьиблепатан Дагъустанда ДУМД-дин марифатдин хилен векил, Дербент райондин мискIиндин имам Къурбан гьажиди.

Микрофондихъ атай райондин общественный палатадин председатель Али Исмаилова диндин межлис Ахцегь райондин кьил Осман Абдулкеримован патай мубаракна.

РД-да Муфтиятдин марифатдин хилен Ахцегь райондин отделдин заведующий Сулейман гьажи Байрамова къейд авурвал, Аллагь-Тааладиз гъавурда аваз ибадат авун патал Ам гьихьтин Аллагь­ ятIа чир хьа­­на кIан­да. Чирун патални чаз Кьуръан ганва, пайгъам­барар ракъур­нава, имамар, алимар ава. Абурукай менфят къачун тавун гунагь я.

— Им чи хуьре, гьакI районда ахлакьдин, диндин тербиядинни­ чирвилерин манадин зурба мярекат я, — лагьана вичин нубатдай РД-дин лайихлу муаллим, мергьяматлувилин “Просвещение” фондунин регьбер, муаллимвилин зегьметдин ветеран Магь­муд Абдулкеримова.

-Теш­килна, кьиле тухузвай ксар, атанвай багьа мугьманар ва иш­тиракза­вай вирибур сагърай! Къуй чи уьлкведа­, гьар са хуьре, кIвале, хи­занда бахт, гьуьрмет, берекат артух хьурай!

Ахпа алимри кIватI хьанвайбурун суалриз жавабар гана; алим Халид Агьмад Гьасаниди Хуьруьгрин хуьруьн имам Ширинбегов Юзбег­ гьажидизни хуьруьн камаллу агъсакъал Абдулкеримов Магьмуд гьажидиз вичин ва ДУМД-дин патай лишанлу савкьатар гана.

Дашдемир Шерифалиев