“Шиирралди Дагъустандин тариф авурбур” фестиваль-конкурсдин сергьятра аваз Стlал Сулейманан тlварунихъ галай госмуздрамтеатрда Ибрагьим Гьуьсейнован «Етим Эмин» трагедиядай Дагъустандин халкьдин артист, театрдин кьилин режиссер Мирзебег Мирзебегова тамаша эцигнава.
Тамашадин гьерекатар XlX-асирдин юкьвара кьиле физва.
Сюжет Етим Эминан (адан ролда РФ-дин лайихлу артист Абдуллагь Гьабибов къугъвазва) дустар тир алимар Хважа Мегьамед эфендидин (РД-дин лайихлу артист Саидин Думаев) ва Алкьвадар Гьасан эфендидин (РД-дин лайихлу артист Руслан Пирвердиев) Алкьвадрал алай гуьзел нурбахчайрикай ийизвай суьгьбетдилай башламиш жезва. Абуру гьахъсузвилери агъавалзавай Дагъустандикай, кесибриз ийизвай зулумрикай, са патахъайни куьмек авачир халкьдикай ихтилатарзава.
Хважа Мегьамед эфендиди Алкьвадар Гьасан эфендидин гуьгьуьл хкажун патал адаз вичин гъилик чирвилер къачузвай, халкьдин залан уьмуьрдикай, адан агьни агьузардикай, мурадрикай шиирар кхьизвай Эминакай суьгьбетзава. Алкьвадар Гьасан эфенди и хабарди шадарзава ва адал кьил чlугвада лугьузва, дуствилин лишан яз тарцелай чуьхвер атlана Эминав вахкун тlалабзава.
Шииратдикай хабар авай Куьре округдин хан Юсуфа (РД-дин халкьдин артист Ибрамхалил Рамазанов) Эмин Сибирдиз акъуддай къарар кьабулзава. Округда гьуьрмет авай машгьур алим Усларан ва Эминан маса дустарин тlалабунриз килигна, адавай вичин фикир кьилиз акъудиз хьанач. Эмин хуьруьн къазивиле тайинарзава.
Тамашада Эминалай арзаяр кхьизвай адан стха Меликан (артист Гьамзабег Эмиралиев) къаматни гегьеншдиз ганва. Девлетлуйриз къайда хуьниз эверзавай, халкьдинни гьахълувилин тереф хуьзвай къази Юсуф хандиз кlанзавачир. Эминан мукьва-кьилийри кхьизвай арзайрикай бине кьуна, Юсуф ханди ам кlвалахдилай алудна ва вири эменни округдин хийирдиз вахчузва.
Ихьтин рахшандар эхиз тахьай Эмин месиз язава. Кефсуззавай Эминан гьалдизни килиг тавуна, хуьруьн кавха Фетягьа (РД-дин лайихлу артист Агъахан Агъаханов) ам вичин кlваляй акъудна, са фуруз вегьезва. Кьуд пад мичlи фура адан рикlел вичин уьмуьрдин юлдаш Туькезбан (Фаризат Зейналова), руш Муслимат (М.Загьирбегова), рикl алай дустар хквезва. Гьа и фура шаирди чан гузва.
Санлай къачурла, эсердин мана гьам режиссердивай ва гьамни актерривай тамам образ хьиз, къалуриз хьанва. Муслиматан ролда къугъванвай Марьям Загьирбегова 4-классда кIелзавай аял я. Баркалла, ада вич сегьнеда лап пешекар артист хьиз тухвана.
Къагьриман Ибрагьимов
