ЦIийи закондин бинедаллаз, 2019-йисан 1-мартдилай инсанар автобусра аваз санай масаниз тухун патал чарасуз яз лицензия къачун лазим жеда. И кар махсус заказдалди ийизвани, тахьайтIа, хсуси игьтияжар тамамарун паталди яни, тафават авач.
Ространснадзордин СКФО-да авай регионрин умуми Управленидай хабар гайивал, эгер инсанар анжах гзаф ксари ишлемиш тийизвай рекьерай тухуз хьайитIа (месела, и ва я маса карханадин агалнавай мулкунай), лицензия герек авач. Махсус ихтияр гьакIни цIаяр кьунрикай хуьдай, медицинадин тади куьмекдин, аварияр хьайила, къутармишдай къуллугърин машинриз герек къведач.
“Дагъустандин мулкунал 1615 субъектдиз пассажирар автобусра аваз санай масаниз тухудай ихтияр гузвай лицензия ава. ЦIийи законодательстводи ихтилат, кьилди къачуртIа, гьихьтин жуьрейрин автотранспортдикай физватIа, ачухарнавач, амма фикирда кьунвайди 8-далай артух ксар тухудай машинар тирди якъин я”, — малумарна идарадай.
Законда цIийи къанундал элячIун патал лазим вахт къалурнава. ИкI, лицензия 2019-йисан 29-июндалди къачуна кIанда. И вахт алукьдалди инсанар санай масаниз тухунал (гьам пешекарар яз, гьамни заказар тамамарун ва хсуси игьтияжар патал) алай вахтунда машгъул компанийри лицензия къачун чарасуз я. Реестрда чпин тIварар авачир ксариз ва карханайриз автобусра аваз инсанар санай масаниз тухун къадагъа жеда.
Гьа са вахтунда Управленида къейд авурвал, Дагъустандин пассажирар санай масаниз тухунал машгъул чIехи пай компанийри лицензия гвачиз кIвалахзава. Иник хсуси машинар гаваз кIвалахзавай ва карчияр яз учетда акъвазиз, налогар гуз такIанзавай кьилдин ксарни акатзава.
“Рейдар кьиле тухудайла, рейсиниз экъечIдалди вилик медицинадин рекьяй ийизвай ахтармишунризни кьетIен фикир гузва. Дуьздал акъуднавай тахсиркарар чна жерме ийизва ва мумкин тир тахсиркарвилерин вилик пад кьун патал гъавурда твазва”, — лагьана Управленидай тир чешмеди.
Чи мухбир
