Советрин Союз, КПСС хьиз, ВЛКСМ-ни тергнатIани, абур миллионралди инсанрин рикIерай садрани акъатдач. Комсомолдин 100 йис гегьеншдаказ къейд авунини и кардин гьакъиндай шагьидвалзава.
7-ноябрдиз Махачкъалада Аваррин драмтеатрдин вилик митинг хьана. Анал рахайбурун арада, играми регьбер Сталинан еке суьретни гваз, зунни авай (юкьванстIалви). Эхь, ЧIехи Сталинан эмирдалди Москвада Яру майдандал 1941-йисан 7-ноябрдиз тухвай параддихъ лап зурба метлеб хьана. Ада вири халкьдин, Яру Армиядин, азадвал, аслу туширвал кIани миллионралди инсанрин руьгь хкажна, чун фашизмдал гъалиб жедайдахъ инанмишвал артухарна.
Инсанар гзаф кIватI хьанвай чкадал чи баркаллу тарих течир, рикIелай алудзавай бязи башибузукьарни гьикI критика ийидач кьван. ВЛКСМ-дин юбилейдихъ галаз алакъалу авуна, жуван рахунра за къейдна хьи, комсомолдин лайихлувилер, гьунарлувилер лап гзаф я. Адан тIварунихъ шегьерар карханаяр, куьчеяр гьавайда янавайди тушир. “Комсомольская правда” газетдин редакциядин коллективди гена и баркаллу тIвар хвенва. Комсомольск на Амуре шегьерни ама. Бес чина? Махачкъалада Комсомольский проспект авайди тир. Гьайиф хьи, и тIвар алудна, адакай гагь I Петрдин, гагь Насрутдинован проспект хьана. За абурун тIварарихъ куьчеяр ягъун кутугнавач лугьузвач, амма Комсомольский лагьай тIвар алудна ваъ!
Гьам вири уьлкведа, гьам чи республикадани, куьчейрилай виликан машгьур тIварар алудиз, абур маса тIварарихъ ягъунин чIуру кIвалах давам жезва. Им жуван тарихдиз кIур гун, бейни маса патахъ элкъуьн я. ИкI виже къведач. За Махачкъаладин мэриядивай кIевелай тIалабзава: Комсомольский проспект арадал хкин! Им анжах тек са зи фикир туш, ихтилат кватай-кватай чкайрал вирида гьа икI лугьузва. Гьахълувилел амална кIанда. Игит, баркаллу Сталинград шегьердин вири дуьньядиз чизвай тIварни чкадал хкун лазим я.
Айдин Балабегов
