Москвада журналистикадин школа тешкилун патал Вирироссиядин жегьилрин медиаконкурсда гъалиб хьайи Кьурагь райондин Ашарин хуьряй тир Зарина Рагьманова са миллион манат пул гуниз лайихлу хьана. Идан гьакъиндай руша социальный сетра авай вичин чинра хабар гана.
З.Рагьмановади суьгьбетна хьи, проектдин сергьятра аваз жегьил блогерар ва журналистар патал чирвилер гудай курсар тешкилда ва кьиле тухуда: журналистикадин школа куьтягьайбуру чуьруькар винел акъудун патал информациядин майданра мониторинг кьиле тухуда.
“Проектдин иштиракчийри маса миллетар такIан хьунин ва экстремиствилин гуьгьуьлар винел акъатзавай вахтара информациядин майданра чпин аксивал къалурда ва абур Россиядин меркезда миллетрин арада ислягьвал ва сад-садан гъавурда акьун мягькемарунихъ элкъуьрнавай серенжемар кьиле тухунал машгъул жеда”, — гъавурдик кутуна З.Рагьмановади.
Вирироссиядин грантдин жегьилрин медиоконкурс 2018-йисан 15-сентябрдилай 15-октябрдалди кьиле фена. И сеферда 1408 арза ганвай, абурукай 1400 экспертди къимет гуналди кардик кутунвай. Алай йисуз конкурсда Россиядин 78 региондин агьалийри иштиракна. Адаз 160 экспертди къимет гузвай.
«Лезги газет»
