И йикъара Махачкъалада, Республикадин клиникадин больницадин гьаятда, лап четин операцияр кьилиз акъуддай цIийи отделение ачухна. Ахьтинди алай вахтунда Кеферпатан Кавказда мад авач. ЦIийи отделение онкологиядин вири азаррин диагностикадал машгъул жеда. КIвалахдин кьетIенвал адакай ибарат я хьи, пешекарриз инсандин бедендин гьи органдай хьайитIани биопсия къачудай мумкинвал ава. Идалайни гъейри, ина дуьньядин хирургиядин тежрибада менфят къачузвай, инсан патал тIимил зарар авай вири технологияр ишлемишда.
КIвалахдин сифте юкъуз больницадин цIийи отделенидиз РД-дин здравоохраненидин министр Жамалудин Гьажиибрагьимов атана. Ам дарамат тадаракламишнавай саягъдиз килигна, гьакIни духтуррихъ ва азарлуйрихъ галаз рахана.
Ж.Гьажиибрагьимова хабар гайивал, ихьтин отделение ачухунин лазимвал фадлай авай. Ина уьлкведин машгьур медидарадин — Сеченован тIварунихъ галай институтдин пешекарри зегьмет чIугвада. Вилик отделение цIийи дережадиз хкажун инсандин бедендиз патал тIимил зарар авай технологияр ишлемишун ква. Идалди чи республикадин агьалийривай, региондилай къецез фин тавуна, медицинадин куьмек къачуз жеда. Идалайни гъейри, къунши республикайрай зенгерзавайбур, иниз атана, операцияр ийиз кIанзавайбурни ава, — къейдна министрди.
Отделение ачухай юкъуз ана сифтегьан операциярни кьиле тухвана. Абур больницадин кьилин духтур, медицинадин илимрин доктор Гьазиявдибир Мусаева кьилиз акъудна. Адан гафаралди, операцияр агалкьунралди кьиле фена, азарлуйри чеб хъсандиз гьиссзава. Мукьвара абур кIвалериз аххъайда.
— Операция авур сад лагьай азарлудан 80 йис тир. Адаз азаб гузвай еке дакIунди туькьуьлдин дамарар (протоки) басмишнавай. Идакди саралух азар арадал атана. Виликдай ихьтин азар пайда хьайи дуьшуьшра инсан рекьизвай ва я, руфунин хейлин чка атIана, операция авун лазим къвезвай. Къе лагьайтIа, чна инсандин беден патал тIимил зарар авай къайдадикай менфят къачуна, пака азарлу касдивай кIвализ хъфиз жеда, — алава хъувуна Гь.Мусаева.
Кьвед лагьай операция чIулав лекьина метастазар арадал атуниз талукьди тир. Виликдай ихьтин дуьшуьшра химиотерапия ишлемишзавай. Амма адахъ гьамиша хъсан нетижа жезвачир. ЦIийи отделенида термозонддин (хамунин кIаникай 120 градусдин чимивал гудай зонд кутуналди) куьмекдалди азарлудан дакIун цIурурна. Ихьтин операцияр виликдай Дагъустанда садрани кьиле тухвайди туш. ЦIийи отделенида алай вахтунда йикъа ихьтин 6 операция кьилиз акъудиз жеда. Ана 20 койка ава. Гележегда ам гегьеншарун пландик ква.
«Лезги газет»
