20-ноябрдиз РД-дин Гьукуматдин Председатель Артем Здунова республикадин эцигунардай хилен карханайри налогрин пулар гун таъминарунихъ элкъуьрнавай серенжемар кьилиз акъудунин барадай ведомствойрин уртах комиссиядин заседание кьиле тухвана.

Месэла веревирд авунив эгечIуналди, ада алай вахтунда эцигунардай хилен карханайриз кьетIен фикир гузвайди къейдна. “За идаз федеральный проект лугьудай, гьикI хьи,  налогрин Федеральный къуллугъдихъ галаз санал и хиле , гуьгъуьнлай экономикадин маса хилерани къайда тун кьетIнава.  Чун па­тал эцигунар — бюджетдиз налогрин еке пу­лар гъиз жедай хел я. Вири и месэлайрал та­йиндаказ машгъул хьун герек я”, — малумарна Артем Здунова.

Гьукуматдин кIвалахдин асул терефрикай сад яз, хсуси доходрин кьадар артухаруникай лугьуналди, министррин кабинетдин руководителди баян гайивал, налогрин Федеральный къуллугъди теклифнавай къайдади и кIвалах ачухдаказ ва секиндаказ кьиле тухудай мумкинвал гуда. “Къе чна сифте­гьан нетижаяр веревирдда. Чи мурад эцигунардай хилел налогрин пар гьалтунин барадай Россиядин юкьван дережадиз экъечIу­никай ибарат я”, — къейдна ада.

Гуьгъуьнлай Артем Здунова налогар гуникай кьил къакъудунин ва я гузвай налогрин пуларин кьадар жезмай кьван тIимила­ру­нин жигьетдай ишлемишзавай къайдайрални фикир желбна. Адан гафаралди, чинебадаказ эцигунар кьиле тухуни неинки  экономикадиз зиян гузва, гьакIни санлай эцигунрин еридиз чIуру таъсирзава.

2018-йисан 9 вацран вахтунда эцигунардай хел хъендикай хкудунин проект кьилиз акъудунин сифтегьан нетижайрикай Россия­дин ФНС-дин стратегиядин ва налогар гун лазим тирбуру чеб кьиле тухузвай гьал ахтармишунин  отделдин начальникдин заместитель Филипп Яровоя суьгьбетна.

ИкI, гъилевай йисан мартдиз республикада эцигунардай хиле налогар гунин кIвалах пайгардик кутунин рекьяй проект кьилиз акъу­дунив эгечIна. И чIавуз региондин налогар гудай  лап чIехи къурулушар тайинарна.

“КIвалах агъадихъ галай терефрихъай тух­вана: рекьер туькIуьрун, яшайишдин кIва­лер ва яшайишдин кIвалер тушир дараматар­ эцигун, эцигунардай материалралди алиш­ве­риш авун ва ахьтин материалар гьазу­рун. Проектдин макьсад сифте нубатда РФ-дин сад авунвай бюджетдиз ва региондин бюджет­диз къвезвай налогрин пуларин кьадар артухаруникай, эцигунардай хиле налогар гузвайбурал административный жигьетдай гьалтзавай пар агъузаруникай, налогрин пулар тагунин­ гьисабдай михьиди тушир конку­ренция кьиле тухунин гьич са жуьредизни рехъ тагунихъ галаз­ алакъалу яз инвестицияр желбунин шар­тIар хъсанаруникай ибарат я”, — малумарна ада.

Докладчидин рахунриз баян гуналди, Ар­тем Здунова алатнавай девирда еке кIва­лах тухванвайди къейдна: “Вири терефрихъай хъсанвилихъ дегишвилер хьанва, вилик мадни еке кIвалах кума, гьикI лагьайтIа чаз налогар кIватIунин барадай региондин мумкинвилер лап чIехибур тирди чизва. Гьавиляй и барадай кIвалах активламишун герек я”. Месэла веревирд авунин карда РД-дин Кьилин ва Гьукуматдин Администрациядин руководитель Владимир Иванова, РД-дин Гьукуматдин Председателдин Сад лагьай заместитель Гьажимегьамед Гьуьсейнова, итиж ийизвай министерствойрин ва ведомствойрин, федеральный къурулушрин РД-да авай территориальный органрин, муниципальный тешкилатрин руководителри иштиракна.

«Лезги газет»