21-ноябрдиз  Сулейман-Стальский райондин Цlийихуьруьн мектебдин чlехи классра кlелзавайбурухъ галаз «Жегьилрин арада терроризмдиз акси серенжем» темадай гуьруьш кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.

Къейднавай серенжемдин макьсад мектебда кlелзавай аялрик ватанпересвилин гьиссер кутун, терроризмдинни экстремизмдин идеологиядивай яргъа авун я.

Гуьруьшда общественный хатасузвилин рекьяй райондин кьилин заместитель А.Фатулаева, АТК-дин пешекар Ю.Юзбегова, жегьилрин «Дербент-2000» терроризмдиз акси форумдин проектдин руководитель Ш.Керимова, коррупциядиз аксивалунин рекьяй райондин кьилин куьмекчи В.Алисенова, райондин спортдин, туризмдин ва жегьилрин крарин рекьяй комитетдин директордин заместитель М.Селимова, мектебдин руководстводи, муаллимри ва 10-11-классра кlелзавай аялри иштиракна.

Кlватl хьанвайбурухъ элкъвена сифте А.Фатулаев рахана. Ада алай девирдин дуьньяда тlал алай месэла тир терроризмдиз аксивалунин чарасузвиликай, вилик пад атlунин чараяр акуникай ихтилатна.

Гуьруьшдал Ш.Керимов, В.Алисенов, тербиядин мектебдин рекьяй мектебдин директордин заместитель Н.Женетханов рахана. Гуьруьш диалог кьиле финалди давам хьана. Иштиракчийри школьникри гайи суалриз жавабар гана.

«Лезги газет»