Дагъустандин эдебиятдин классик Етим Эминан 180 йисан юбилейдихъ галаз алакъалу суварин сергьятра аваз, лезгийрин алай аямдин машгьур шаир Майрудин Бабаханова «Етим Эминаз бахшзава» тIвар алаз ктаб чапдай акъуднава. И гьакъиндай «Лезги газетдиз» Сулейман-Стальский райондин администрациядин пресс-къуллугъди хабар гузва.
Ктабда лезги шаирри, эдебиятчийри халкьдин рикI алай шаир Етим Эминаз бахшнавай шиирар гьатнава: Шагь-Эмир Мурадова, Къазанфер Зульфукъарова, Алирза Саидова, Байрам Салимова, Ханбиче Хаметовади, Мердали Жалилова, Пакизат Фатуллаевади, Майрудин Бабаханова, Фейзудин Нагъиева, Абдуселим Исмаилова, Нажмудин Шихнабиева, Арбен Къардаша, Азиз Мирзабегова, Сажидин Саидгьасанова, Шагьабудун Шабатова, Хазран Кьасумова ва хейлин масабуру чпин фикирар шиирра къалурнава.
Къейд ийин, 2018-йис Сулейман-Стальский райондин кьил Нариман Абдулмуталибова Етим Эминан йис яз малумарна. Ктабда и къарарни къалурнава. Етим Эминан юбилейдиз талукь мярекатар лезгийри гегьеншдиз кьиле тухузва.
«Лезги газет»
