И йикъара чав чIулав хабар агакьна: 63 йисан яшда аваз, яргъалди чIугур залан азардикди чи акьалтIай намуслу, гъейратлу рухвайрикай сад, хъсан пешекар-вилерин духтур, Республикадин офтальмологиядин больницадин кьилин духтурдин заместитель Селимхан Гьажимирзоевич Селимханов рагьметдиз фена. Адахъ галаз санал кIвалахай коллективди, чидай вирибуру, мукьва-кьилийри, багърийри, дериндай яс чIугунивди, сада-садаз сабурар гузва.
С.Гь.Селимханов 1955-йисуз Мегьарамдхуьруьн райондин Муьгъверганрин хуьре дидедиз хьана. Ина юкьван школа, 1979-йисуз Дагмединститут акьалтIарна. Кьве йисуз вич рекье тур Горький шегьерда, ахпа Чечняда кIвалахна.
1982-йисалай инихъ ада вичин вири къуватар ва чирвилер Дагъустандин здравоохраненидин хилез, инсанрин сагъламвал хуьниз бахшна. 1986-йисалай инихъ ада винидихъ тIвар кьунвай клиникада зегьмет чIугвазвай, 2003-йисалай — кьилин духтурдин заместитель яз.
РикI михьи, гъил кьезил, рахуниз фасагьат, кьилин категориядин духтур вирибуруз гьакьван ачух ва мукьва кас тир. Адакай вирида анжах разивилин чими келимаяр лугьудай. Неинки вилер зайиф хьанвай сагъсузбурун, гьакI вичин коллективдин, общественностдин арадани адахъ чIехи гьуьрмет ва авторитет авай.
Селимхан Гьажимирзоевич хьтин духтур, хва къакъатун вири Дагъустан патал еке магьрумвал я. Адан рикIик хъийидай гзаф крар кумай. Амма залум ажалди мумкинвал ганач.
Чна рагьметлудан хизандиз, мукьва-кьилийриз, багърийриз, вири муьгъверганвийриз, хажалат чIугуналди, башсагълугъвал гузва. Селимхан Гьажимирзоевич Селимханован экуь къамат садрани чи рикIелай алатдач.
«Лезги газет»
