Са сеферда Абдуллагь бин Зайд аль-Ансариди Пайгъамбардиз (с.а.с.) лагьана:

— Я Аллагьдин Расул (с.а.с.)! Вун заз жувалайни, эменнидилайни, аялрилайни ва хизандилайни багьа я. Эгер вун акунин хъсанвал авачиртIа, заз жув кьена кIандай.

Ахпа ам шехьиз башламишна. Пайгъамбарди (с.а.с.) накъварин себебдикай жузурла, ада жа­ваб гана:

— Я Аллагьдин Расул (с.а.с.) ! Чунни ва куьнни, вахт атайла, рекьидайди за фикирнай ва куьн эхиратда, амай пайгъамбаррихъ галаз чIехи дережада жеда. Чакай рахайтIа, гьатта женнетдиз гьахьайтIани, чун анжах агъада авай дережайра жеда  ва чаз куьн аквадач. И фикир себеб яз, зун шехьна.

Пайгъамбарди (с.а.с.)  са гафни лагьанач. Гьа и вахтунда Аллагьди аят рекье туна (мана): “Ал­лагьдиз ва Расулдиз муьтIуьгъбур Аллагьди хъсанвал ганвай пайгъамбаррихъ, дугъри итимрихъ, шагьидрихъ ва пак инсанрихъ галаз жеда. Гьикьван гуьзел я а юлдашар!” (“ан-Ниса” сура, 69-аят).

Са кьадар йикъар алатна, Абдуллагь бин Зайда багъда кIвалахзавайла, адан патав, нефес-нефесдихъ текъвез, хва атана ва Аллагьдин Расулди (с.а.с.) чан ганвайдакай малумарна. Зурзун акатай вафалу асгьабди Аллагьдиз дуьа авуна:

— Я Аллагь! Заз Мугьаммад Пайгъамбардилай (с.а.с.) кьулухъ мад садни ахкван тийидайвал, зи вилерин ишигъ вахчу!

Аллагьди адан дуьа кьабулна ва Абдуллагь аль-Ансари уьмуьрдин эхирдалди буьркьуь хьана (Имам аль-КъуртIуби, “аль-Жами ли-Агькамиль Къуръан”, 5-том, 271-чин).

Насигьат

Аллагь патал жезвай кIанивал виридалайни чIехиди я. Амай асгьабризни Пайгъамбар (с.а.с.) рикIин сидкьидай кIанзавай. Абур ам патал чпин чанар, эменни ва хизанар къурбанд ийиз гьамиша гьазур тир.

“Эгер вун акунин хъсанвал авачиртIа, заз жув кьена кIандай” лугьудай гафара асгьабдин­ чIехи кIанивални вафалувал ава. Пайгъамбар  рагьметдиз фейидалай кьулухъ амай асгьабрин руьгьерин гьаларни гьа ихьтинбур тир. Месела, и пашман хабар агакьайла, Умар асгьаб инанмиш хьаначир. Адаз гзаф пис хъел атан­вай ва ада, вичин гапур акъудна, а хабар агакьа­рай инсанриз къурхуяр гуз башламишнай. Асгьабриз Пайгъамбар (с.а.с.) гьакьван кIан­­дай­. Чи ри­­кIерани адахъ гьа ихьтин кIани­вал хьун лазим я. Вучиз лагьайтIа, гьадисдал асас­лу­ яз, низ­ Пайгъамбар (с.а.с.) вирида­лайни гзаф кIан­за­ватIа,  гьахьтин инсандин иман тамамди я.

Али Эмирсултанов