Къадим Дербент йикъалай-къуз абад ва чIехи жезва, цIийи куьчеяр, тамам микрорайонар арадал къвезва. Асул гьисабдай кьилдин ксарин кIвалерикай ибарат “Аэропорт” тIвар алай микрорайонни гьа жергедик акатзава. Ина поликлиника, юкьван мектеб, аялрин бахча, хейлин туьквенар, 17 ва 4-нумрайрин маршрутрин автобусар кардик ква.
Гьа са вахтунда, эхиримжи йисара арадал атанвай са жерге маса микрорайонра хьиз, инани агьалияр инжиклу ийизвай татугайвилер авачиз туш. Абурукай кьилинбур тIвар кьунвай “Аэропорт” микрорайонда чиркин ятар фидай турбаяр (канализация), электрикдин экверин гужлувал бес кьадар, куьчеяр инсанар ва автотранспорт патал къулайбур тахьун я.
Вири и месэлаяр фикирда кьуналди, шегьердин администрацияди микрорайонда агьалийриз яшайишдин къулайвилер арадал гъун патал лазим кIвалахрин махсус план — “рекьерин карта” -тестикьарнава. Мукьвара абур кьилиз акъудунни гъиле кьунва.
Мисал яз, агьалияр электроэнергиядалди таъминарун хъсанарунин мураддалди, шегьердин бюджетдилай къерехдай тир такьатрихъ цIийи кьуд трансформатор маса къачуна, чкадал хканва ва абур кардик кутунив эгечIнава. Марфадин ятар авахьдай канализация гегьеншарун патални алава яз 400 метр турбаяр гьазурнава, зирзибиларни вахт-вахтунда дашмишунин мураддалди алава транспорт чара ийида, и барадай агьалийрихъ галаз икьрарарни кутIунзава.
Малум тирвал, шегьердин къадим тарихдин пайни аваданламишунин кардиз артух фикир гузва. Гьелбетда, тарихдин ивирар хуьналди. И барадайни, Дербентда “Шегьерда яшайишдин къулайвал яратмишунихъ 10 кам” махсус проект кардик ква.
Чкадин агьалийриз хьиз, йисалай-суз чпин кьадар гзаф жезвай туристар патални генани хъсан шартIар яратмишзава. И барадай “Нарын-Кала” къеледал хкаж жедай ва эхвичIдай цIийи маршрут туькIуьрда, магьалрин куьчеяр ва тротуарар аваданламишда.
Дербент шегьердин УЖКХ-дин начальникдин заместитель Шамил Рашидова малумарайвал, шегьердин тарихдин пай аваданламишунин кIвалахар 2019-йисан эхирдалди акьалтIарда.
Къейдна кIанда хьи, и чкаяр аваданламишуник кьилдин карханайрин коллективрини чпин пай кутазва. ИкI, “Дербентская винодельческая компания” ООО-ди (руководитель Эмил Омаров) “Шегьерда яшайишдин къулайвал яратмишунихъ 10 кам” проектдин фондуниз 300 агъзур манат пул чара авунва.
ЦIийи рехъ
Уьлкведин гзаф шегьерра хьиз, Дербентдани автотранспорт къвердавай гзаф жезва. Ида са кьадар четинвилерни арадал гъизва.
ГьакI тирвиляй, шегьердин къерехдай фидай рехъ туькIуьрунин лазимвал арадал атанва.
Къейдна кIанда хьи, шегьердин кеферпатай яна тухузвай рекьин са кьадар кIвалахар гьеле тамамарнава ва генани давамарун лазим я. Кар алайди финансрин такьатар бес кьадар чара авун тирди фикирда кьуналди, Дагъустанда, кьилди къачуртIа, Дербентда ва Хасавюртда шегьеррин къерехдай фидай рекьер туькIуьрун патал 50 миллиард манатдилай артух пул чара ийида.
Идан гьакъиндай РД-дин транспортдин ва рекьерин майишатдин пресс-къуллугъди хабар гузва.
Нариман Къарибов
