Бязи делилралди, Сулейман-Стальский райондин Курхуьр илимдин рекье машгьур ксаралди девлетлу я. Алакьунар авай жегьил алим, географиядин илимрин кандидат  Раким  Камилович  Магьмудовни  гьабурукай сад я лугьуз же­да. Ам 1984-йисан 19-майдиз Курхуьре дидедиз хьана. Ирид йис жедалди ватан­да яшамиш хьайи Раким диде-бубадихъ галаз Ставропольский крайдиз  куьч хьана. 2001-йисуз ада Светлоград шегьердин 1-нумрадин мек­­теб куьтягьна. 11-классда кlелзавай­ла, ам краеведенидай кьиле фейи олимпиадада гъалиб хьана. 2005-йисуз Ракима Ставрополдин госуниверситетдин географиядин факультет акьалтIарна, и вузда кlвалахиз эгечlна.

Р.Магьмудова 2010-йисуз аспирантура куьтягьна, 2011-йисуз “Микрогеографические особенности “социального дна” крупного города (на примере обследования бездомных в г. Ставрополе)” темадай диссертация хвена. Ам Ставрополда авай Кеферпатан Кавказдин федеральный университетдин (СКФУ) тlебии илимрин институтдин картографиядинни геоинформатикадин кафедрадин доцент я.

Чи ватанэгьлидикай бажарагълу жегьилриз куьмек гунин рекьяй тайинарнавай РФ-дин Президентдин премиядин сагьибни хьана.

Вичи ахтармишай месэладиз талукь яз ада документальный фильмни гьазурна. И фильм куьруь кинойрин “Муза-2007” ва “Гимишдин плен­ка” фестивалрин лауреат хьана.

Раким Магьмудова вичин пешедин месэлайриз талукь тир илимдин хейлин кlвалахар кхьенва, абур илимдин журналра ва маса чешмейра чапнава. Ам урусрин географический об­ще­ст­во­дин член, СКФУ-дин инновацийрин, коммерциализациядин отделдин начальник я.

Къуй адахъ мадни зурба агалкьунар хьурай!­

Куругъли Ферзалиев