16-ноябрдиз Сулейман-Стальский райондин кьил Нариман Абдулмуталибова нубатдин сеферда агьалийрин дердийрихъ яб акална. И гьакъиндай «Лезги газетдиз» райондин администрациядин пресс-къуллугъди хабар гузва.
Н.Абдулмуталибова вичин кабинетда хейлин агьалияр кьабулна. Агьалийри асул гьисабдай кIвалахдал тайинарунихъ, яшайишдин хилехъ, образованидихъ, ЖКХ-дин шартIар хъсанарунихъ, материалдин жигьетдай куьмек кIан хьунихъ ва чилерихъ галаз алакъалу месэлайрикай чпин фикирар, дердияр лагьана.
КIвалах кIанзавайбурун арзаяр райондин кьили вичи дикъетдик кутадайди хиве кьуна. Чилихъ галаз алакъалу месэлаяр къарагъарай агьалийризни рази жедай жавабар гана, и арзаяр «УМиЗ» МБУ-дин руководителдал тапшурмишна.
Пенсийрин, мажибрин ва икI маса хсуси месэлайрин патахъайни жуьреба-жуьре куьмекар герек кIанз райондин кьилин патав агьалияр атанвай. Санлай къачурла, нубатдин сеферда райондин кьили 14 агьали кьабулна, абуруз месэлаяр гьялунин карда куьмек хиве кьуна.
«Лезги газет»
