И йикъара Докъузпара райондин Къаракуьре хуьруьн кимел жемятдин иштираквал авай гегьенш сход кьиле фена. Ана хатасузвилин рекьяй райондин кьилин заместитель Къ.Мегьединова, Къаракуьре хуьруьн администрациядин кьил Гь. Балабегова, РФ-дин ФСБ-дин сергьятрин къуллугъдин векилди иштиракна.

Малум хьайивал, РФ-дин сергьятар хуьзвай къуллугъдиз и хуьруьз къвез-хъфизвай ксар ахтармишун патал и мулкуна махсус пост эцигдай фикир ава. Хуьруьн къенез гьахьзавай муькъвелай эгечlна, сергьятчийрин лишан алай мулкунал кьван пост эцигунин месэладикай халкь хабардарна.

Чкадин агьалийри пост эцигунин месэладиз талукь яз чпин наразивал къачуна. Абурун фикирдалди, инсанар датlана гьерекатдик квай мулкуна пост эцигуникди инжиклувилер арадал къведа. Гьавиляй абуру инсанар яшамиш жезвай чкадивай яргъа тир мулкара эцигун истемишна. Сергьятдин къуллугъчиди жемятдин фикирарни теклифар заставадин кьилив агакьардайди лагьана.

Эхирдай сергьятрин къуллугъдин векилди и мулкара шаклу месэлаяр, къанунар чlурай дуьшуьшар арадал атайтlа, чпиз хабар гун тlалабна.

«Лезги газет»