Рекьерин гьерекатар хатасуз авунин макьсаддалди Кьурагь райондин администрациядин къуллугъчи Ш.Мусаева, четин месэлаяр арадал къвезвай рекьерин участокра гуьзгуьдин лишанар тайинарун теклифна.
«Кьурагь район» МР-дин администрациядин пресс-къуллугъди «Лезги газетдиз» хабар гузвайвал, къейднавай теклиф райондин кьил З.Азизова хушдиз кьабулна ва гьасятда рекьерин гуьзгуьдин лишанар къачунин гьакъиндай къарар акъудна.
Рекьерин гьерекатар хатасуз авунин гьакъиндай райондин комиссиядин нубатдин заседанидал гуьзгуьдин лишанар эцигунин чарасузвайл авай чкаярни тайинарна. 14-ноябрдиз райцентрадин Умарованни Назаралиеван куьчеяр сад-садал гьалтзавай чкадал кьве гуьзгуьдин лишанар эцигна. Лишанар тайинаруникди алай вахтунда улакьар гьалзавай ксариз пуд терефдихъайни мукьвал жедай улакьар виликамаз аквадайвал хьанва.
«Лезги газет»
