9-ноябрдиз Дагъустандин Кьил Владимир Васильева региондин Гьукуматдин цIийи состав раижна. Саки вири ксар чпин къуллугърал алама. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
“Къе чна къуллугърал тестикьарун лазим тир цIийи команда, цIийи руководителар гьазурнава. Региондин Кьил яз, за Указдал къул чIугвада ва гьар са касдин патахъай жуван хивез жавабдарвални къачуда. Гьа са вахтунда гьар са кандидатдин хивени жавабдарвал аваз жеда”, — лагьана цIийи состав раиждай чIавуз В.Васильева.
Идалай вилик республикадин Гьукуматдин Председатель Артем Здунова министррин цIийи кабинетдин къурулушдиз талукь теклифар гана. ЦIийи къурулушдал асаслу яз, Дагъустандин милли политикадин рекьяй министерствони намусдин азадвилин, диндин тешкилатрихъ галаз санал кIвалахунин рекьяй комитет сад ийизва.
Гила Дагъустан Республикадин Гьукуматдин Председателдихъ муьжуьд заместитель, гьа гьисабдай кьве кас сад лагьай заместителар жезва. Идалайни гъейри, Дагъустан Республикадин ветеринариядин рекьяй комитет ва Дагъустан Республикадин уьзуьмчивилин, ичкидин ва ички квай продукция гьасилунин, кардик кутунин рекьяй комитет тергнава, абурун везифаяр Дагъустан Республикадин хуьруьн майишатдин ва суьрсетдин министерстводин хиве тунва. Дагъустан Республикадин государстводин финансрин контролдин къуллугъдин везифаяр Дагъустан Республикадин финансрин министерстводин хиве твада.
Чпин къуллугърал алама
Гьакъикъатда вири вице-премьерар ва министрар чпин къуллугърал аламукьнава. Региондин Гьукуматдин председателдин сад лагьай заместителар тир Анатолий Къарибовав, Гьажимегьамед Гьуьсейновав чпин къуллугъар гума. Владимир Лемешкодикай цIийи вице-премьер хьанва. Региондин Гьукуматдин Председателдин заместителдин везифаяр вахтуналди тамамарзаваз хьайи Рамазан Жафаровни къуллугъдал тестикьарнава.
Гилан министр Абдулмуслим Абдулмуслимовни вице-премьервиле — Дагъустандин хуьруьн майишатдин ва суьрсетдин министрвиле амукьзава. Гилан вице-премьер ва министр Екатерина Толстиковани Дагъустан Республикадин Гьукуматдин Председателдин заместителвиле — чилерин ва эменнидиз талукь алакъайрин министрвиле амазма, Гьукуматдин Председателдин заместитель — образованидин ва илимдин министр яз хьайи Уммупазил Омаровани гьа и къуллугъдал алама. Гьукуматдин Председателдин муьжуьд лагьай заместителдин къуллугъдал гьелелиг кас тайинарнавач.
Агъадихъ галай министрар чпин къуллугърал аламукьзава: культурадин — Зарема Бутаева, здравоохраненидин — Жамалудин Гьажиибрагьимов, эцигунрин ва яшайишдин кIвалеринни коммунальный майишатдин — Малик Баглиев, транспортдин ва рекьерин майишатдин — Ширухан Гьажимурадов, милли политикадин ва динрин крарин рекьяй — Татьяна Гамалей, гражданвилин оборонадин крарин, кьетIен гьаларин ва тIебиатдин бедбахтвилерин чIуру нетижаяр арадай акъудунин — Нариман Къазимегьамедов, тIебиатдин ресурсрин ва экологиядин — Набиюла Къарачаев, физический культурадин ва спортдин рекьяй — Мегьамед Мегьамедов, финансрин — Юнус Саадуев, жегьилрин крарин рекьяй — Камил Саидов, информатизациядин, алакъадин ва массовый коммуникацийрин — Сергей Снегирев, промышленностдин ва энергетикадин — Сайгидпаша Умаханов, экономикадин ва территорияр вилик тухунин — Осман Хасбулатов.
Дегишвилер ва цIийи кадрияр
Региондин гилан зегьметдин ва яшайишдин жигьетдай вилик финин министр Расул Ибрагьимов Дагъустандин туризмдин ва халкьдин художественный сеняткарвилерин рекьяй министерстводин кьиле акъвазда. Дагъустандин юстициядин министерстводиз кадрийрин сад лагьай конкурсда гъалиб хьайи Къазимегьамед Сефикъурбанова регьбервалф гуда. Дагъустандин зегьметдин ва яшайишдин жигьетдай вилик финин министерстводин кьиле Изумруд Муьгьуьтдинова жеда. Идалай вилик ада Москвада РФ-дин Президентдин патав Да-гъустандин гьамишалугъ векил яз кIвалахзавайди тир.
«Лезги газет»
