Дагъустандин меркездин администрациядин штат 27 процентдин (штатдин 70 уьлчмедин) тIимиларнава. Идакай “Лезги газетдиз” Махачкъаладин мэриядин пресс-къуллугъди хабар гана.
Эгер виликдай республикадин меркездин администрациядин аппаратда штатдин 250 уьлчме авайтIа, гила абурун кьадар 180 хьанва. ГьакIни администрациядин къурулушдин подразделенийрин штатни 20-далай 14-дал кьван тIимиларнава.
Идалайни гъейри, къурулушра чпени дегишвилер кьиле фенва. Шегьердин капитальный эцигунриз талукь месэлайрай кардик квай управленидин везифаяр архитектурадин ва градостроительстводин управленидив вахканва. Мадни са шумуд управление сад хъувунва, Махачкъаладин мэрдин куьмекчийринни меслятчийрин кьадарни тIимиларнава.
Къейд ийин хьи, кIвалахдикай магьрум хьанвай пешекаррин 40 процент муниципалитетдин къуллугъда маса кIвалахрал тайинар хъувунва. Администрациядин къурулуш тамамди хъувунин серенжемар давам жезва.
«Лезги газет»
