Ахцегь райондин РДК-дин тамашачийрин залда ВЛКСМ арадал атайдалай инихъ 100 йис тамам хьуниз талукьарнавай мярекат шад гьалара кьиле фена. Фойеда лишанлу йикъаз талукь яз райондин край чирдай музейдин ва ИЗО-дин студиядин къуллугъчийри Ленинан комсомолдин тарихдикай, чи райондин комсомолрин крарикай суьгьбетзавай, “Зи комсомолвилин жегьилвал”, “Комсомол — зи кьисмет” тIварар алай экспозицияр тешкилнавай. Мярекатда райадминистрациядин, РУО-дин къуллугъчийри, райондин школайрин директорри, муаллимри, ученикри, искусстводин школадин тербиячийри ва общественностдин векилри иштиракна.
Юбилейдин серенжем 1-нумрадин СОШ-дин ученикрин дестеди “Комсомол” мани хордалди тамамарунилай башламишна. Тебрикдин гаф рахуналди, “Ахцегь район” МР-дин кьилин заместитель А.Шуаева лагьана.
— Гьуьрметлу юлдашар, за райадминистрациядин кьилин, райондин собранидин депутатрин патай квез комсомолдин юбилей мубаракзава. Советрин властдин девирда, уьлкведин вири пипIера хьиз, чи райондани комсомолар коммунистрин баркаллу крара умудлу куьмекчияр хьана. Виликдай чи райондин комсомолрин кьадар 7 агъзурдалай алатнавай.
Октябрдин революциядин ва Ватандин ЧIехи дяведин йисара комсомолри къалурай игитвилер тешпигь авачирбур я. РикIел хкиз кIанзава хьи, 1978-йисуз хуьруьн майишатдин производстводин асул хилерай къазанмишай виниз тир агалкьунрай ва государстводин тапшуругъар артухни алаз тамамарунай Ахцегь район КПСС-дин ЦК-дин, СССР-дин Министррин Советдин, ВЦСПС-дин ва ВЛКСМ-дин ЦК-дин гъиляй-гъилиз къведай Яру пайдахдиз лайихлу хьанай. Иник чи комсомолрин зегьметдин пайни квай…
РДК-дин гьевескар артистри ва ученикри комсомолдиз талукь манийрикай ибарат концерт гана. ВЛКСМ-дин 100 йисан юбилейдин мярекат рикIел аламукьдайди хьана.
Рагьидин Эминов
