“Лезги газетдин” 41-нумрада ганвай “Зегьметдин къагьриманар” макъала (автор — Хийир Эмиров) чна рикIивай кIелна. Ана Со­циализмдин Зегьметдин Игитвилин тIва­рар къазанмишай лезги рухвайрин, рушарин тIва­­рар гьатнава. Бейкеф жедай кар ам я хьи, гьа и сиягьда чи хуьруьнви, Узбекистанда 17 йисуз жавабдар участокдин начальниквиле кIва­лахай Социализмдин Зегьметдин Игит, хъуьлуьдви Алиев Алимирзадин тIвар кьунвач­.

Алиев Алимирза кесиб хизанда 1933-йисуз дидедиз хьана. Вахтсуз дидени-буба галатай пуд стха — Къурбан, Агъамирза, Алимирза етимар яз амукьна. Хуьруьн мектеб куьтягьай Алимирза 1954-йисуз Советрин Армиядин жергейриз тухвана. Анай хтай гада Огнидин 4-нумрадин механический училищедиз кIелиз фена. Ина ада машинист-тракториствилин пешекарвал къачуна.

1956-йисуз ам къанни вад кас жегьилрин дестедик кваз, партиядин эвер гуналди, хам чилер къарагъариз, Узбекистандиз фена.

— Чун аниз акъатайла, гьинихъ вил вегьей­тIани, аквазвайди лал кьенвай баябан чуьл тир. Я юргъунвал алуддай, я ксудай, я ветIе-рин­ лужарихъай кьил чуьнуьхдай чка авачир­, — рикIел хканай Алимирзади. — Гьа ина чна чилер памбаг цун патал гьазурна кIан­завай.

“Кашан чуьлдиз” техника гъанмазди, Алиев Алимирза кьиле аваз механизаторрин бригада тешкилна. Палаткайрик йифер акъу­диз, адан бригадади памбаг цадай чилер гьазуриз хьана.

Гьа икI, йисар къвез алатна. “Кашан чуьл­да” шуьрекат чилер кьелерикай михьна, лаз алатна, анаг памбаглухдиз элкъуьрна. Механизаторрин гуьгъуьналлаз атай эцигунардайбуру хам чилерал цIийи Янчиер шегьердин бине кутуна. 1966-йисуз хъуьлуьдви партиядин жергейриз кьабулна. Ахпа Дустлик тIвар алай поселокдин зегьметчийри ам, чпин патай векил яз, Узбекистан ССР-дин Верховный Советдин депутатвиле хкяна. 1966-йисан 30-апрелдиз баябанлух чуьлдал чан гъайи викIегь лезги хва Алиев Алимирзадиз Социализмдин Зегьметдин Игитвилин тIвар ганвайвилин гьакъиндай Указ акъатна.

2008-йисан гатуз Алиев хизанни галаз мугьмандиз хтана. Хуьруьн культурадин кIва­ле Игитдин 75 йисан юбилей кьиле тухвана. И юбилейдик Рутул, Ахцегь районрай атанвай гзаф кьадар мугьманри иштиракна.

Алиев Ташкентда яшамиш жезва. Адахъ кьве рушни са хва ава. Са руш Ольга Ташкентда, Татьяна Австралияда яшамиш жезва. Владимир бубадихъ галаз Ташкентда ава.

Гьуьрметлу ватандаш, Квехъ чандин сагъвал, яргъи уьмуьр хьун чна  Аллагьдивай тIалабзава.

Саид-Агьмед Абдурашидов