Дагъустандин вад райондин агьалияр хъвадай целди таъминардай линия туькIуьрна акьалтIарунин кIвалахриз 100 миллион манат харжда. 2008-йисалай инихъ башламишай и водопровод алай йисан декабрдин юкьвара ишлемишиз вахкун пландик кутунва. Ихьтин малумат ава Сад тир информациядин къурулушдин сайтда.
Вичихъ секундда 17 агъзур кубический метрдилай артух къуватлувал авай водопроводди республикадин 40 агъзурдалай виниз агьалияр хъвадай целди таъминарун лазим я. «Лезги газетдиз» Сулейман-Стальский райондин администрациядай хабар гайивал, санал кIватIнавай (централизированный) къайдада целди таъминарун гьелелиг авач.
«Водопровод эцигунихъ галаз алакъалу кIвалахар кьиле тухузвай чка-Сулейман-Стальский райондин Агъа СтIалрин, Вини СтIалрин хуьрер я. «Сардархуьр-ДаркIуш-Къазмаяр» водопроводдин кIвалахар 2018-йисан 15-декабрдалди акьалтIарда. Контрактдин вини кьилин къимет -100 миллион манат я», — къейднава документра.
Цин объект эцигна акьалтIарайла, неинки Сулейман-Стальский райондин 90 процент, гьакIни Табасаран райондин Сыртыч, Мегьарамдхуьруьн райондин Советский, Кьурагь райондин Моллакент, ЦIийи Кьуьчхуьр, Кумух ва Хив райондин ЗахитI хуьрерин агьалиярни целди таъминариз жеда. И проект кьилиз акъадуни 2,5 агъзур га цик квачир чилер дигидай мумкинвални гуда.
Водопроводдин заказчик Сулейман-Стальский райондин администрациядин капитальный эцигунрин управление я, поставщик- “Стройоригинал” ООО. Проект кьилиз акъудзавайбуру магистралдин чилин винелай ва кIаникай яд тухудай цин турбаяр кутун, яд михьи ийидай станция, къецепатан сетар ва целди таъминардай имарат, канализация эцигун лазим я.
«Лезги газет»
