Белиждин гимназияда Советрин Союздин Игит, Афгъанистандин чилел аскерар-юлдашар кьиникьикай хуьн патал вичин чан къурбанд авур Абас Исрафилов рикlел хкуниз талукьарнавай мярекат кьиле фена.
Пакаман сятдин цlудаз гимназиядин вилик квай майдандал мугьманар кlватl жезва. Гимназиядин гьаятда авай А. Исрафилован памятникдал гьуьрметдин вахтада акъвазнавай пионеррикай ибарат дестеди дежурство тухузва.
«Советрин Союздин Игит Абас Исрафилов рикlел хкунин югъ» гафар ва адан шикил алай банерди виридан фикир вичел желбзава. Суварин къайдада алукlнавай аялрин гъилера гьар жуьре рангарин шарар, Россиядин ва Дагъустандин гъвечlи пайдахар, цуьквер ава.
Мярекатда Дербент райондин кьилин везифаяр вахтуналди тамамарзавай Фуад Шихиева, РД-дин Халкьдин Собранидин депутат Ферзилагь Исламова райондин кьилин заместитель Садир Эмиргьамзаева, Белиж поселокдин кьил Рамиз Гьабибулаева, Белижда авай военный частунин командир Владимир Меркулова, Ватандин Чlехи дяведин ветеран Павел Фомича, райондин образованидин управленидин начальник Пирмали Новрузалиева, афгъанви ветеранри, райондин школайрин директорри, поселокдин общественностди, СМИ-рин векилри ва масабуру иштиракна.
Мярекат гимназиядин директор Нариман Шихмегьамедова ачухна. Ада сифте гаф Ф. Шихиеваз гана.
— Гьуьрметлу мугьманар, муаллимар ва аялар, за квез виридаз хушвилелди салам гузва, — лагьана Ф. Шихиева. – СССР-дин Игит Абас Исрафилов рикlел хкун яз кьиле тухузвай ихьтин мярекатдихъ зурба метлеб ава. Чи халкьдин къатарай акъатнавай игитрин кьегьалвилер рикlе хуьз, А. Исрафилован ва ам хьтин маса кьегьалрин чешнейралди аялар ватанпересар яз тербияламишзавай муаллимрин чlехи коллективдиз баркалла.
Дуьньядин гьалар йисалай-суз къизгъин жезва. Чун уях, мукъаят хьана, сифте нубатда чна чlуру фикирар авайбурукай акьалтзавай несил хвена кlанда. Ихьтин мярекатралди школада кlелзавай аялриз ватанпересвилин тербия гузвай куьн сагърай
Ахпа анал Ферзилагь Исламов, Владимир Меркулов, А. Исрафиловахъ галаз санал къуллугъай Виктор Кузнецов, Рамиз Гьабибулаев ва масабур рахана. Абурун виридан фикир сад тир: кьегьал рухвайрин игитвилерал дамах авун, акьалтзавай несилдиз ватанпересвилин тербия гун.
Аялри ватанпересвилин темадай сегьнеяр къалурна, манияр лагьана, кьуьлерин нумраяр тамамарна.
Эхирдай Игитдин обелискдал цуьквер эцигна, рикlел аламукьдай шикил яна.
Къагьриман Ибрагьимов
