30-октябрдиз Москвадин миллетрин кIвале лезги литературадин классик Етим Эминан 180 йисаз талукьарнавай чIехи межлис кьиле фена. Ам тешкилайбур Москвада кардик квай ФЛНКА, «Москвадин лезгияр» РНКА ва Ярославль шегьерда авай лезгийрин НКА я.
Мярекатдин иштиракчийриз Етим Эминан эсеррикай лезет хкуддай мумкинвал хьана. Инал милли литературадиз чIехи итиж ийизвай хейлин ксар рахана. Абурук общественный деятелар, алимар, литературоведар, Москвада яшамиш жезвай жегьилар квай.
Межлис ФЛНКА-дин жегьилрин департаментдин активистри кьиле тухвана. Чпин рахунра абуру Етим Эминан уьмуьрдин рекьикай ва яратмишунрикай хейлин къиметлу фикирар лагьана.
Вичин маналу гаф рахуналди, ФЛНКА-дин руководитель, РФ-дин Президентдин патав гвай милли алакъайрин рекьяй Советдин член Ариф Керимова къейд авурвал, лезги, милли къанажагъ арадал атунин карда Етим Эминан ирсинихъ кьетIен метлеб ава. Ам хуьн, чирун, несилрив агакьарун чи виридан буржи я. Ариф Керимова алай вахтунда Лезгийрин Милли Культурадин Автономияда кьиле физвай бязи дегишвилерикайни суьгьбетна ва милли тарих, чIал, культура чируниз, хуьниз эвер гана.
КIватI хьанвайбурун вилик тIвар-ван авай алим – философ, Россиядин илимрин академиядин академик, РАН-дин философиядин Институтдин илимдин руководитель Абдусалам Гьуьсейнов рахана. Ада Етим Эминан эсеррин философиядин жигьетдай деринвиликай, метлеблувиликай суьгьбетна. Етим Эминан ирсиниз жезмай кьван мукьва хьун, чирун, къвезмай несилрив агакьарун важиблу тирди къейдна. Алимди мярекатдал шаирдин вирибуруз машгьур «Дустариз» шиир хуралай кIелна.
Атанвайбур ФЛНКА-дин контрольно-ревизионный комиссиядин руководитель Шихмегьамед Мурсалова тебрикна. Ада мярекат тешкилайбуруз сагърай лагьана, ихьтин гуьруьшар мукьвал-мукьвал тухун герек тирди къейдна.
Межлисдин иштиракчияр Интернетдин куьмекдалди чIехи экрандилай Сулейман-Стальский райондин кьил, машгьур алим, лезги чIалан ва литературадин дибар дериндай чизвай Нариман Абдулмуталибова тебрикна.
Етим Эминан уьмуьрдикай ва яратмишунрикай, эхиримжи жагъанвай цIийи документрикай метлеблу доклад гваз мярекатдал общественный деятель ва шаирдин биография ахтармишзавайди тир Низами Абдулгьамидов экъечIна. Ада Етим Эминан ирс ахтармишунин жигьетдай хьанвай хейлин цIийивилер къейдна.
Залда авайбуру шаирдин «Дустариз» ва «Дуьнья – гургьагур» шииррихъ яб акална. Абуруз талукь видеороликар Махачкъалада кардик квай Кьиблепатан Дагъустандин жегьилрин Союздин активистри гьазурнавайбур тир. Жегьил ватанпересар тир Аслан Панагьова ва Гуьлизар Керимовади сегьнедилай Эминан «Фана дуьнья», «Билбил» шиирар кIелна.
Инал гьакI Дагъустандин халкьдин шаир Арбен Къардашан «Фана багъдин гьуьруьяр» тIвар алай пьесадай сегьнейризни килигна.
Межлис элкъвей столрихъ чаяр хъуналди, атанвай мугьманар агъмиш авуналди давам хьана.
Эминан дуст ва гьа девирдин зурба арифдар хьайи Къазанфар Зулфикъарова лагьай «На куькIуьрна, стха, вун Аллагьди хуьй, Дили — диванадиз чирагъ, эй азиз…» гафар мад сеферда тикрарна, дуьньядин литературада ва культурада Эминан дережа кьакьанди тирди субутна…
«Лезги газет»
