Эхиримжи вахтара Дагъустандин милли чIалар авай гьалди абурун сагьибрик къалабулух кутазва. Малум тирвал, хайи чIалал рахазвайбурун кьадар къвердавай тIимил хьуникди халкьдин милливални кьилдинвал зайиф жеда, гележегда а халкьдикай тарихда анжах тIвар амукьда. Гьалар гьакIни писзавайла, гьукум гъиле авайбуруни гъвечIи халкьарин чIалариз талукь яз гагь-гагь ихтилатар цIалцIамбур ийизватIани, крар хъсанбур жезвач. Ибур бинесуз ихтилатар туширдан гьакъиндай хайи чIалариз талукь закон тахьуни, мектебра хайи чIаларин сятер тIимиларуни, гьакI маса делилрини шагьидвалзава.
Хайи чIалахъ рикI кузвай ксарни авачиз туш. Жуван чIал, меденият вилик тухунин жигьетдай са фикирдал алай ватанпересри чпелай алакьдай серенжемар кьабулзава, мярекатар тешкилзава. ИкI, 28-октябрдиз Сулейман-Стальский райондин Вини СтIалрин мектебда республикадин кьиблепатан округдин мектебра 9-11-классра кIелзавай аялрин арада лезги чIалайни эдебиятдай сад лагьай сеферда яз олимпиада кьиле фена. Лезги халкьдин рикI алай шаир, классик Етим Эминан 180 йисан юбилейдин мярекатрин сергьятра аваз мергьяматлувилин “Леки” фондуни Сулейман-Стальский райондин администрациядихъ галаз санал кьиле тухвай мярекатда Сулейман-Стальский, Кьурагь ва Хив районрин мектебрин ученикри иштиракна.
Олимпиада кIелзавайбурун кьатIунар еримлу авунин, яратмишунрин кIвалахда абурун гьевес хкажунин, лезги чIалаз вини дережада итиж ийизвай, чпихъ алакьунар авай аялар винел акъудунин ва хайи чIал машгьур авунин макьсадралди кьиле тухвана.
“Леки” фондунин векилрикай мярекатда Фарман Шайдабегова, Назим Дашдемирова, Раиса Жалиловади иштиракна. Олимпиада кьиле тухунин теклиф гайиди “Леки” фондунин векилрикай сад тир Руслан Мегьдиханов я. Фондунин векил яз, ада хайи чIал, меденият вилик тухунин проектриз регьбервал гузва.
“КIвалахар аваз, цIи заз олимпиадада иштиракдай мумкинвал хьанач. Олимпиада тухунин карда зегьмет чIугур, иштиракай вирибур сагърай. Им сифте кам я. Гележегда чна мадни гегьенш камар къачуда. Заз и олимпиада гьар йисуз кьиле тухудай адет кутаз кIанзава”, — лугьузва Р.Мегьдиханова.
Къейд ийин, олимпиада тешкилуник, ам кьиле тухуник Сулейман-Стальский райондин образованидин управленидин пешекар Назират Азимовади кьетIен пай кутуна. Мярекатда “Лезги газетдин” кьилин редактор Мегьамед Ибрагьимовни авай.
Олимпиадада пуд райондай 59 аялди иштиракна. 9-классда кIелзавайбурун арадай сад лагьай чкаяр Рамазанова Фаридади (Вини СтIал) ва Набиева Ангелинади (Курхуьр), кьвед лагьай чкаяр Рамазанова Периди (Саидхуьр) ва Рагьмалиева Маинади (Агъа СтIал-Къазмаяр), пуд лагьай чкаяр Агъаларова Назлухалума (НуьцIуьгъ) ва Нурдинова Сабинади (Кьулан СтIал) кьуна.
10-классда кIелзавайбурун арада сад лагьай чкаяр Межидова Эрлана (Курхуьр) ва Сафаралиева Шамсията (Кьулан СтIал), кьвед лагьай чкаяр Мирзоева Замиради (Кьулан СтIал) ва Гьажиханова Миланади (Вини СтIал), пуд лагьай чкаяр Ашурагъаева Селимата (Фригъар) ва Рамазанова Гуьлизара (ЦIийихуьр) кьуна.
11-классда кIелзавайбурун арада сад лагьай чкаяр Рустамова Эмилияди (Курхуьр) ва Пирмегьамедова Эмиляди (Вини СтIал), кьвед лагьай чкаяр Гьажимирзоева Эльвинади (Агъа СтIал-Къазмаяр) ва Фатагьова Фатимади (Агъа СтIал-Къазмаяр), пуд лагьай чкаяр Алагькъулиева Алинади (Кьасумхуьр) ва Исаева Эльмиради (Агъа СтIал) кьуна.
Гъалибчийриз ва приздин чкаяр кьурбуруз грамотайрилайни савкьатрилай гъейри, “Леки” фондунин патай пулдин пишкешар гана.
Куругъли Ферзалиев
