Чи уьмуьрда спортди важиблу чка кьазва. Вини дережадин агалкьунар хьанвай спортсменрилай миллионралди жегьилри чешне къачуз алахъзава. Са шакни алачиз, чемпиондин агалкьунар адан тренердин-насигьатчидин алахъунрилай гзаф аслу я. Мегьарамдхуьруьн райондин администрациядин пресс-къуллугъди хабар гузвайвал, райондин кьил Ф. Агьмедова тренерриз пешекарвилин сувар тебрикнава.

«UFC-дин чемпион Гьабиб Нурмегьамедован буба, тренер Абдулманап Нурмегьамедов гьа ихьтин чешнелу насигьатчи я. Ада чlехи авур ва тербия гайи спортсменди Дагъустан республика вири алемдиз машгьурна.

30-октябрь тренеррин пешекарвилин суварин югъ я. Къуй вири тренеррихъ-насигьатчийрихъ чандин сагъвал, къуватлувал, викlегьвал ва вини дережадин агалкьунар хьурай!», — лагьанва Фарид Агьмедован тебрикда.

«Лезги газет»