Подписка — 2019
Дуьнья гьар са юкъуз, гьар са декьикьада дегиш жезва. Гьикьван гьайиф чIугвадай кар ятIани, вахтуни, уьмуьрди чалай вилик акатна гьерекатзава. Ингье, гъилевай 2018-йисан гатфарни, гадни акваз-такваз акъатна, зулни тамамдаказ вичин ихтиярда гьатнава, кьуьдни яргъал алач… Им 2019-йис патал чи багъри “Лезги газет” кхьидай вахтни агакьнава лагьай чIал я.
Гаф авач, алай вахтунихъ, девирдихъ галаз кам-камуна аваз финалди, халкьдин дерди-балайрикай хабар кьуналди, пара четин месэлаярни къарагъаруналди, “Лезги газетди” чи гьар садан уьмуьрда лайихлу чка кьунва. Зи фикирдалди, инлай кьулухъни гьакI жеда! Эхь, “Лезги газетди” жемятдин вилик вичин везифаяр лайихлувилелди тамамарзава. Ам уьмуьрдин яцIа ава. Аферин!
Газетдин чинра республикадин, иллаки кьиблепатан региондин, яни лезги районрикай ва хуьрерикай, Самурдин там, вири тIебиат хуьникай, дагълух хуьрерни тIебии газдалди таъминаруникай, къулай рекьер туькIуьруникай, экономикадин, медениятдин, образованидин, хуьруьн майишатдин хилерикай мукьвал-мукьвал таъсирлу, метлеблу макъалаяр чапзава.
Газетдин дуст ва мухбир яз, зазни чизвайвал (кIелзавайбуру чпин фикирарни лугьузва), тежрибалу журналистар, газетдин редакциядин къуллугъчияр тир Ш.Шихмурадован, Ж.Саидовадин, М.Жалилован, Н.Ибрагьимован, Д.Шерифалиеван ва чкайрилайни кхьизвай хейлин мухбиррин макъалаяр кIелзавайбуру чIехи разивилелди кьабулзава. Чпин къелемар мадни хци хьурай!
Дербент шегьерда “Лезги газет” кхьиник (яшлувилизни, бедендин сагъламвилизни килиг тавуна) жувалай алакьдай пайни кутазвай (гьакI хьунни лазим я!) заз макъала гзаф яргъи тавуна, жуван фикиррикайни теклифрикай куьрелди лугьуз кIанзава. Виридалайни кьилинди ам я хьи, газет кIелзавайбурув вахт-вахтунда ахгакьзавач. Мисал яз, хемис юкъуз акъатзавай газет дербентвийрив ислендин юкъуз ахгакьарзава. Газетда алишверишда, чи базарра, туьквенра, авай чIуру гьаларикай лап кьериз-цIаруз кхьизва.
ЦIийи рубрикаяр: “Газетдиз чар атана”, “Гьина? Мус? Вуч?”, “Лезги ким”, “Пуд несилдин векилар”, “Булахар кьуразва. Вучиз?”, “Куь азад вахт”, “Аскердин чар” ва са жерге масабур мад кардик кутуртIа, пис жедач.
“Девирдин шикилар”- сатирадин рубрика кIелзавайбуруз, гьа жергедай яз зазни, гзаф бегенмиш хьанвай. Ам кардик кухтунин лазимвал ава. Эгер айгьамдин карикатураяр ракъурдай, кхьидай, кас авачтIа, и рубрикадик кваз сатирадин шиирар, гъвечIи фельетонар, критикадин макъалаяр (куьруь), юморескаярни гайитIа жеда.
“Газет — кIелзавайди — газет” махсус чин мукьвал-мукьвал, эгер мумкинвал хьайитIа, гьафтеда садра гайитIа хъсан я.
Лезги халкьдихъ девлетлу, тарифуниз лайихлу эдебият ава. Четинди тир алай девирдани гзаф дуьшуьшра чпин хсуси такьатрихъ чи зарийри, шаирри ктабар акъудзава. Гаф авач. Мадни гзаф акъатрай метлеблу ктабар. Амма са кар ава: “Лезги газетда” саки гьар са ктабдиз гегьенш анализ гузва, абурукай яргъи макъалаяр кхьизва. Иллаки эхиримжи вахтара. “Шаирдин (заридин) цIийи ктаб”, “ЦIийи ктабар” рубрикайрик кваз куьрелди кхьейтIа хъсан я.
Зи фикирдалди, гьакIни чинар тIимил хьанвай газетда телевиденидин программа тагайтIани жеда.
Гьуьрметлу редакция, гьуьрметлу кIелзавайди, захъ газет генани хъсанди хьуниз талукь тир теклифар, тIалабунар мадни ава. Амма, макъала за “Лезги газетдиз” жуван вафалувал, кIанивал къалурзавай шиирдалди куьтягьда:
“Лезги газет” чи —
Руьгьдин девлет чи,
Гьар кIвале суьгьбетчи,
ЧIал ширин шуьрбет чи!
Шиирни хкет чи,
Зарбачи зегьметчи!
Ваз даим гьуьрмет чи!
Ви таъсиб чна хуьда,
Хуьда уьмуьрлух!
Гьар сада кхьида,
Тадач ярумчух!
Эхь, вун кхьида,
Кхьида гзаф,
Садрани ракъидач
Ви таъсирлу гаф!
Чан “Лезги газет” —
Чи руьгьдин девлет!
Зани вун патал —
Бул кхьин патал
ЧIугвада зегьмет!
И шиир зи эркин
РикIин хабар я.
“Лезги газет” кхьин
Гьар садан кар я!
Нариман Къарибов
