Даггосуниверситетдин филологиядин факультетда Дагъустандин культурадин ва чIаларин йикъаз талукь чIехи мярекат кьиле фена. Гьелбетда, филологар тир муаллимрилай ва студентрилай Дагъустандин халкьарин меденият, чIалар низ хъсандиз чир жеда кьван?! Вузда “Дагъустандин милли майдан” лишандик кваз тешкилнавай мярекатдал студентри гзаф халкьарин Дагъустандин меденият, чIалар, халкьдин сивин яратмишунар, адетар раижна.
Студентрин алакьунрихъ галаз таниш жез мярекатдиз ДГУ-дин ректор Муртазали Рабаданов, проректорар тир Мегьамед Гьасанов, Мадина Мегьамедова, вуздин профсоюздин тешкилатдин председатель Нуькьади Рабазанов, Аваррин госмуздрамтеатрдин директор Мегьамедрасул Мегьамедрасулов атанвай.
Гьуьрметлу мугьманри, кьилди къачуртIа, Муртазали Рабаданова вини дережада аваз ихьтин мярекат тешкилунай филфакдин регьберриз, РДО-дин кафедрайрин коллективриз ва студентриз сагърай лагьайдалай кьулухъ филологиядин факультетдин декан Шабан Мазанаева виридаз сувар мубаракна. Ада къейдайвал, “Дагъустандин милли майдан” тешкилун факультетдин хъсан адетрикай сад хьанва. Эгер тарсара муаллимри студентрин чирвилериз къимет гузватIа, ихьтин мярекатра жегьилрин алакьунар маса терефрихъай малум жезва.
Майдандал кIуьд халкьдин медениятдихъ, кьуьлерихъ, манийрихъ, адетрихъ, гъилин-тупIун сенятрихъ, эдебиятдихъ, тIуьнрихъ галаз таниш жедай мумкинвал авай. Лезги студентрини чи халкьдин надир меденият раижна, манияр лагьана, чпин ва классикрин эсерар кIелна… Эхирдай студентри гьазурнавай концерт гана.
Пакад юкъуз гьа и суварин сергьятра аваз “Республикадин урус чIалан ва культурадин центрадин” векилри ДГУ-дин, ДГТУ-дин студентар, Дагъустандин вузра кIелзавай къецепатан уьлквейрин векилар, Азербайжандин ва Сириядин диаспораяр Кавказда авай урусрин культурадихъ галаз танишарна.
Мярекатдиз РД-дин милли политикадин министрдин заместитель А.Магьмудов, РФ-дин къецепатан крарин рекьяй министерстводин Махачкъалада авай векил М. Аджиев, вузрин муаллимар ва маса мугьманар атанвай.
Центрадин директор Лариса Кукановади мугьманар хушдиз кьабулзавай, милли тIуьнар дадмишайдалай, выставкайриз килигайдалай кьулухъ урусрин милли манийрин концертдихъ яб акалдай, кьуьлердай мумкинвални авай.
Дагъви Шериф
