Милли музыкадин ирс-адетар хуьзвай устад далдамчи ва кеменчи, муаллим, РД-дин лайихлу артист, республикадин “Душа Дагестана” премиядин ва Россиядинни международный цIудралди конкурсринни фестивалрин лауреат, туькIвей хизандин кьил ва къени къилихрин гьуьрметлу инсан. Эхь, вири тарифар гьа са касдикай я — Нуруллагь Эмирбегович Эмирбеговакай.
Ам 1957-йисуз Ахцегь райондин Хуьруьгрин хуьре, машгьур музыкант, ДАССР-дин культурадин лайихлу работник Эмирбег Эмирбегован (Дагъустандин культурадин лайихлу къулугъчи тир адан тIварунихъ хуьруьн клуб гала) чIехи ва зегьметкеш хизанда дидедиз хьана. Неинки хайи хуьре, гьакI Самур дереда, Дагъустандани машгьур музыкант-кеменчи тир адан кIвале гьамиша музыкантар, мугьманар кIватI жедай. Ихьтин гьалара чIехи хьайи аяларни, тIебии я, милли музыкадал рикI алай мугьманпересар хьана, абуру чпин кьисмет музыкадин милли искусстводихъ галаз алакъалу авуна. ИкI, чи халкьдин милли вири музалатрал (кфил, зуьрне, балабан, далдам, саз, тар, кеменча, чIагъан) лап хъсандиз къугъвазвай чIехи стха Сейфуллагь Эмирбегов, РД-дин лайихлу артист, Лезгийрин госмуздрамтеатрдин музыкант я, веледар, хтулар — бажарагълу музыкантарни манидарар. Нуруллагьан хва Жаруллагьа, культурадинни искусстводин институт кIелна, бубадихъ галаз санал Луткунрин хуьруьн музшколада муаллимвиле кIвалахзава…
Хуьруьн мектебдин 9-класс, Азербайжандин Сумгаит шегьерда С.Гьажибегован (Узеир Гьажибегован хва) тIварунихъ галай музучилище агалкьунралди акьалтIарай жегьил пешекар 1975-йисан январдиз Махачкъаладин филармонияда кIвалахал кьабулзава. Гьа чIавалай инихъ, ингье 44 йис я, Нуруллагьа, вичин сеняткарвилиз вафалу яз, халкьдиз къуллугъиз. Пешекарри хиве кьазвайвал, бубадилай ирс яз атанвай музыкантвал вичин ивидик квайвиляй къе Дагъустанда гьадалай зурба кеменчи авач. Ам Ахцегь РДК-дин къуллугъчи ва Луткунрин музшколадин тежрибалу муаллим я.
17-октябрдиз Ахцегь райондин культурадин кIвале Нуруллагь Эмирбегован яратмишунрин межлис кьиле фена. Докъузпара, Рутул, Мегьарамдхуьруьн районрайни мугьманар атана, зал тамашачийрив ацIанвай. Сегьнедин са пата, столрихъ Ахцегь муниципалитетдин кьил Осман Абдулкеримов, культурадин управленидин начальник Къистер Гъаниева, Докъузпара райондин кьилин заместитель Салегь Гьажимурадов, муькуь пата багърийрин юкьва Нуруллагь Эмирбегов ацукьнавай.
Сифте гаф рахуналди, межлис культурадин управленидин начальникдин заместитель Сулейман Сулейманова ачухна. РДК-дин гьевескар акртистрин дестеди маш-гьур “Ша, Эмирбег, ша!” (гьава Эмирбегован ва чIалар К.Казимованбур) мани тамамарайдалай кьулухъ райондин регьбер Осман Абдулкеримов рахана.
— Им са Хуьруьгринни Ахцегьрин ваъ, Самур дередин вири агьалийрин сувар тирдан гьакъиндай чи хуьрерай, къунши районрай атанвай кьван мугьманри, абуру чи музыкантдиз кьетIен гьуьрмет авуни шагьидвалзава. Машгьур бубадин ирс лайихлудаказ давамарзавай, милли музыкадин хъсан адетар хуьзвай, далдам, кеменча хьтин надир алатрин куьмекдалди акьалтзавай несил мани-макьамдин гуьзел алемдиз желбзавай Нуруллуагь Эмирбеговаз баркалла!… — чими гафарилай кьулухъ Осман Абдулкеримова милли музыкадин ирс хуьнин рекье чIугвазвай яргъал йисарин зегьметдай Н.Эмирбеговав Чухсагъулдин чарни пулдин премия вахкана.
Докъузпара райондин кьилин заместитель Салегь Гьажимурадова (зал шадарун патал ам ашукь Шемшир ва сегьнедин маса устадар галаз атанвай) райондин руководстводин, вири докъузпаравийрин патай пишкешни галай Тебрикдин чар кIелна.
Райондин дережада Эмирбеговрин тIварцIихъ ихьтин гурлу, шад межлис къурмишунай Нуруллагьан ими АбдулмутIалибани чIехи вах ФетIимади райондин кьил Осман Абдулкеримоваз, культурадин управленидин начальник Къистер Гъаниевадиз, РДК-дин коллективдиз вири мугьманризни районэгьлийриз чухсагъул малумарна. “Куьне чи шадвал артухарзава, къуй куь шадвал Аллагьди артухаррай!” — алхишна абуру.
Н.Э.Эмирбеговаз тебрикдин хуш келимаяр гваз сегьнедал гьакI Рутул райондин больницадин кьилин духтур Идрис Алиев, Хъуьлуьдрин хуьруьн культурадин кIвалин директор Рамазан Кьасумов, Хуьруьгрин хуьруьн кьил Загьидин Сулейманов, КьакIарин хуьруьн культурадин кIвалин директор Рамидин Сулейманов, райондин культурадин управленидин начальник Къистер Гъаниева, Ахцегьрин ва Луткунрин музшколайрин директорар тир Абдурагьим Рагьимовни Каира Саидова ва масабур экъечIна. Ашукь Шемшира, Дагъустандин лайихлу артистка Рубаба Къурбановади, гьевескар артистар тир Зульфия Велиевади, Назлу Шагьбановади, Эмирсултан ва Мадрид Бегееври, Фикрет Баширова ва масабуру манияр тамамарна.
Нуруллагь Эмирбегова вичиз ихьтин гьуьрмет авунай райондин руководстводиз, культурадин управленидин коллективдиз, мугьманриз, ахцегьвийриз, вири районэгьлийриз сагърай лагьана ва Эмирбеговрин хизандин ансамблдин алакьунралди зал мад сеферда гьейранарна. Пуд сятда давам хьайи межлис, гьакъикъатдани, инсанрин рикIер михьдай, руьгьер тухардай ва яргъалди бейнида амукьдай гьайбатлуди хьана.
Дашдемир Шерифалиев
