Кеферпатан Кавказдин регионрин, ЧIулав ва Каспий гьуьлерин къерехра авай, мукьвал ва яргъал тир къецепатан уьлквейрин урус театррин международный 5-фестивалдин нетижайриз талукь яз Махачкъалада Урус драмтеатрдин художественный регьбер Скандарбег Тулпаров, театррин международный “MOST” фестивалдин художественный регьбер Нина Мазур, РФ-дин культурадин лайихлу работник Николай Жегин, Россиядин писателрин Союздин член Александр Мягченков ва масабур журналистрихъ галаз гуьруьшмиш хьана.
Нина Мазура фестиваль кьиле фейи къайдадин, къалурай тамашайрин тарифна. Къейдайвал, экспертри мукьвавилер ва чаравилер тайинарзавачир, абуру тамашаяр къалурунин къайда, актёррин кIвалах ва театрдин искусстводин маса куьлуь-шуьлуьяр ахтармишзавай.
Инал рахай амай экспертрини фестиваль лап вини дережада аваз кьиле фейиди къейдна. Актёрриз, театррин регьберриз къунши регионра чпин кIвалахдин юлдашрин гьаларикай, агалкьунрикай чир хьана.
Театровед Гулизар Султановади къейдна, Дагъустанда — гзаф миллетрин ва гзаф театррин республикада — урус театррин фестиваль дуьшуьшдай кьиле физвач.
— Чаз чун, чи театрар масабурулай тIимил аквазва. И фестиваль кьиле тухуз тахьай са шумуд йисуз Дагъустандин ва маса республикайрин театррин уьмуьрда гзаф крар кьиле фена. Сагърай фестивалдин тешкилатчияр, абуру театррин гьерекат кардик кухтуна.
Мугьманри журналистрин суалризни жавабар гана. Абуру къейдайвал, тамашачиярни рази хьана, уьлкведиз машгьур театррин лап хъсан тамашаяр хушвилелди кьабулна.
Малум хьайивал, фестивалда Дагъустандин Урус театр виридалайни хъсанбурун жергеда ава.
Чи мухбир
