Лезгийрин СтIал Сулейманан тIварунихъ галай госмуздрамтеатрдин коллективди хъсан адетар исятдани давамарзава. Гьамиша хьиз, сентябрдин вацра театрди зулун цIийи сезон ахъайна.
Адан репертуарда гьар жуьредин: гьам чи классикрин, гьам къецепатан уьлквейрин драматургрин ва, гьелбетда, алай аямдин авторрин пьесайрин бинедаллаз туькIуьрнавай лап хъсан тамашаяр ава. Амма Дагъустандин халкьдин артист, театрдин кьилин режиссёр Мирзабег Мирзабегова цIийи сезон цIийи “Сефил жемир, Мадина” тамаша къалуруналди ахъаюн кьетIна. Театрдин коллективдиз кьилин режиссёрдин меслят хъсан акуна.
Ингье, тамашачийрив ацIанвай чIехи залдин сегьнедал театрдин директор Динара Эминова экъечIна. Сифте хайи коллективдиз, ахпа вири жемятдиз цIийи сезон мубаракайдалай кьулухъ ада лагьана: “Къе чун патал кьетIен югъ, сувар я лагьайтIа жеда. ЦIийи сезон ачухун — им театрдин уьмуьрда лап чIехи, важиблу вакъиа я. Коллективда авай тежрибалу актёррин регьбервилик кваз, жегьил актёрри йисалай-суз театрдин репертуар гьар жуьредин тамашайралди девлетлу ийизва. Театрдин кIвалах акваз-акваз вилик физва, кьилин режиссёрдилай башламишна, актёрри ва гьар са къуллугъчиди гьакъисагъвилелди, пешедиз вафалувилелди зегьмет чIугвазва. Эхиримжи йисара чи театрда алай аямдив кьур гьам драмаяр, гьам къемедаяр сегьнеламишнава. Чна театрдин кIвалах яратмишунрин рекьяй вилик фин патал Махачкъаладай ва маса республикайрани чпиз кьетIен бажарагъ авай пешекарриз теклифзава, абурун куьмекни галаз тамашаяр эцигнава. Месела “ЧIулав дагъви” къемеда эцигай режиссёр Алисултан Батыров паталай атанвайди тир. Идалайни гъейри, бажарагълу жегьил актёрар Москвадиз режиссёрвилин курсариз ракъурзава. Месела, жегьил режиссёр Казбек Думаева кIелна хтайдалай кьулухъ театрдин репертуардик кьве мах кутунва, — къейдна театрдин директорди ва цIийи тамашадикай рахана. “Сефил жемир, Мадина” -чи уьмуьрдин драма я. Тамаша эцигай режиссёр Мирзабег Мирзабегова исятда чи инсанрин арада авай алакъаяр лап дуьзвилелди къалурнава. Квез чи бажарагълу актёрри и кар субутарда”, — алава хъувуна Динара Эминовади.
Дугъриданни, тамаша таъсирлуди хьана. Мадинадин роль тамамарзавай Дагъустандин халкьдин артистка Фаризат Зейналовади вири тамашачияр тажубарна, залда гзафбур вилел нагъв алаз ацукьнавай. Дуьзвал гвай, инсандин язух къведай Мадинадин буба кьейидалай кьулухъ, кIелзавай институтни туна, руш шегьердай хуьруьз хтана, азарлу дидедин гуьгьуьл къачуз, адахъ гелкъвез хьана. ЧIехи стхаяр авайтIани, рушаз, гъил кьуна, куьмек гудай кас авачир. Мадина йиф-югъ талгьана дерзичивал авуна, кьил хуьниз мажбур хьана.
Мадина Сафина — алай аямдин дишегьлийрикай сад я. Виридаз хьиз, адазни уьмуьрдин шадвал, бахтаварвал хас тир. Амма жегьил руша йифиз масабуруз перемар цваз, юкъуз азарлу дидедин гьал чиз, адан шикаятар эхи ийиз, вири четинвилериз дурум гана. Инсанар кIандай, абурун язух къведай, гьуьрмет ийидай, дуствал хуьдай Мадина вичин дуст руш Хамидадин пехилвилел, къунши Ания халадин туьнтвилел, чIехи стха Исакьан нагьакьанвилел ва кIани Мирзенуран хиянатвилел гзаф нарази тир.
Гьикьван уьмуьрда чIурувилер гьалтнатIани, рикI алай диде кечмиш хьанатIани, Мадинади вилелай нагъв ракъурнач. Амма, ви-чихъ авай са руш, Талия вахтсуз къакъатуникди, адаз дуьнья мичIи, вилерин экв зайиф хьана. ЯтIани камаллу, сабурлу дишегьлиди вичин дуьзвал, инсанвал квадарнач. Уьмуьрдин четинвилериз дурум гана, кьил агъуз тавуна, уьтквемвилелди яшамиш хьана. Мадинади вирибуруз сабур гузвай, инсанар дуьз рекьел хкизвай.
Хамидадини Анияди, уьмуьрдин юлдаш Мирзенура Мадинадивай тахсиррилай гъил къачун тIалабна. Уьмуьрда вилелай нагъв ракъур тавур, вич милайимвилин, зерифвилин, регьимлувилин, язухвилин чешне хьайи Мадина, эхирни, шехьна… Ибур шадвилин накъвар тир! Вич тек туширди, вичи вичин инсанвал квадар тавурди гьиссна, вилер шадвилин накъварив ацIана, амма уьмуьр са чкадал акъвазнавач, ам давам жезва, виликди физва…
Тамашада Дагъустандин лайихлу артистар, Руслан Пирвердиева — Мирзенуран, Саидин Думаева — Исакьан, бажарагълу артисткаяр Эльмира Къарахановади — Аниядин, Эмина Вагьабовади — Хамидадин ва жегьил артистар Амалия Керимовади — Талиядин, Рамик Рамазанова — Рустаман къаматар лап вини дережада аваз арадал гъана.
Тамаша куьтягь хьайила, тамашачийри кIвачел акъвазна капар яна. Тамашади лап таъсир авур са шумуд кас сегьнедиз хкаж хьана, режиссёрдиз ва актёрриз сагърай лагьана.
Эминат Загьирбегова,
театрдин литературадинни драмадин отделдин заведующий
