“Лезги газетдиз” Дербент шегьердин администрациядин пресс-къуллугъди хабар гайивал, и йикъара шегьердин кьил Энрик Муслимова куьгьне хьанвай кIвалерай куьчарунин программадин сергьятра аваз Ленинан куьчеда акьалтIарзавай эцигунрин кIвалахар ахтармишна. Ина кIвалахар “Первый строительный” ООО-ди тамамарзава.
Э.Муслимова къейд авурвал, Дагъустанда куьгьне хьанвай кIвалерай куьчарунин программа вахтунда кьилиз акъудиз алакьнач. РД-дин Кьилин тапшуругъдалди Дербентда программадин сергьятра аваз кьиле тухвана кIанзавай кIвалахар 1-ноябрдалди акьалтIарун лазим я. Алай вахтунда шегьерда Ленинан куьчеда — 4-6, Буйнакскдин куьчеда 68, 68 “б” нумрайрин кIвалер эцигна куьтягьнавач. Дербентдин мэрдин гафаралди, абур эцигунрин кIвалахар акьалтIарайдалай кьулухъ кIвалер сифте “Жилище” ГКУ-ди, гуьгъуьнлай — РД-дин чилерин ва эменнидин алакъайрин министерстводи кьабулун герек я. Ахпа абур агьалийрихъ галаз икьрарар кутIунун патал муниципалитетдив вахкуда.
“Первый строительный” ООО-дин генеральный директорди хиве кьурвал, вири кIвалахар хъсан ери аваз 29-октябрдиз акьалтIарда.
«Лезги газет»
