9-октябрдиз Махачкъалада Россиядин ФСБ-дин директор, терроризмдиз акси Милли комитетдин председатель Александр Бортникован регьбервилик кваз НАК-дин заседание кьиле фена. Ана Дагъустан Республикадин Кьил Владимир Васильевани иштиракна.
Заседанидин кIвалахда Россиядин Федерациядин милли гвардиядин кьушунрин главнокомандующий — Россиядин Федерациядин милли гвардиядин кьушунрин Федеральный къуллугъдин директор Виктор Золотова, РФ-дин Силисдин комитетдин председатель Александр Быстрыкина, охранадин Федеральный къуллугъдин директор Дмитрий Кочнева, РФ-дин МВД-дин министр Владимир Колокольцева, РФ-дин здравоохраненидин министр Вероника Скворцовади, Кеферпатан Кавказдин Федеральный округдин регионрин кьилери иштиракна.
Заседанидиз атанвайбур тебрикуналди, Александр Бортникова делилламишна хьи, властдин органрихъ галаз санал къайдаяр хуьдай органри кьиле тухвай серенжемри ва профилактикадин мярекатри Кеферпатан Кавказдин Федеральный округдин мулкара террордихъ галаз алакъалу таксиркарвилер кьве сеферда тIимилардай мумкинвал гана.
“Чна саналди тухванвай кIвалахди хъсанвилихъ дегишвилер арадал гъиз куьмекна. ИкI, террористар, бандитрин дестеяр инсанралди ва пулдалди таъминарзавай рекьер гуьтIуь жезва, къецепатай абуруз куьмек гузвай уламар къайдаяр хуьдай органри агалзава. Чкайрал бандитрин дестеяр тешкилиз алахъзавай террористрин гьерекатрихъни эхиримжи вахтара нетижаяр жезвач. Гъилевай йисуз саналди тухвай кIвалахдин нетижада ругуд терактдин вилик пад кьуна. 63 бандит ва абуруз куьмекзавай 142 кас кьуна, 50 боевик тергна. Абурун арада Чечняда ва Дагъустанда кардик квай террористрин дестейрин башчиярни авай”.
Идахъ галаз сад хьиз, НАК-дин председателди къейдна хьи, Кеферпатан Кавказдин регионра террориствилин международный тешкилатрин патай хаталувал амазма. И жигьетдай террористрин дестейрин башчийри Мукьвал тир РагъэкъечIдай патан уьлквейра кьиле физвай дявейра иштиракай бандитар хтуник ва абур кардик кутуник умудар кутазва.
Жаванрин, жегьилрин арада терроризмдин идеологиядин таблигъат артухаруналди, террористриз абур чпин инсафсуз, алчах крара ишлемишиз кIанзава.
Вичин рахунра А.Бортникова гъилевай йисуз Грозныйда ва Къизлярда бандитри хашпара дин вяз ийизвайбурун ибадатханайрал гьужумайди рикIел хкана. Терроризмдин идеология гегьеншарзавайбуруз жуьреба-жуьре динрин векилар сад-садал гьалдариз кIанзава.
Террориствилин а гьерекатрин вилик пад кьадай ва мониторингдин кIвалахар артухарун лазим я. НАК-дин Председателди регионрин терроризмдиз акси комиссийрин руководителриз гьа и рекьяй кIвалахун чпин хсуси гуьзчивилик кутуниз, террордиз акси муниципальный комиссийриз методикадин ва тежрибадин рекьяй куьмек гуниз эвер гана.
Заседанидал терроризмдиз акси яз тухвана кIанзавай кIвалахдиз талукь маса месэлаярни гьялна.
Гьазурайди — Нариман Ибрагьимов
