10-октябрдиз Мегьарамдхуьруьн райондин кьил Ф.Агьмедова райондин  агьалийрин хсуси дердийрихъ яб акална. Райадминистрациядин пресс-къуллугъди хабар гузвайвал, и сеферда райондин кьилин патав 12 агьали атана. Агьалийрик гзафни-гзаф бейкарвилин, социальный куьмекар герек хьунин, и ва я маса документар къайдадик кутунин месэлайри къалабулух кутунвай.

Кьилив атай вирибурухъ галаз райондин кьили талукь тир суьгьбетар кьиле тухвана, месэлайрин патахъай гъавурдик кутуна.

Икl, Мегьарамдхуьряй тир агьалидиз вичин эменни ва чилин участок гададихъ кlвачихъ ягъунин карда куьмек кlанзавай. Ихьтин жуьредин месэла Хтун-Къазмайрин хуьруьн агьалидизни авай. Райондин кьили и месэлаяр, са четинвални авачиз, МФЦ-дин идарадай гьялиз жезвайдакай агьалияр гъавурдик кутуна.

Бязи месэлаяр чкадал гьялна. Къейд ийин, агьалияр кьабулунин серенжемда, адет тирвал, неинки райондин кьили, гьакl райадминистрациядин жавабдар къуллугъчийрини иштиракна.

«Лезги газет»