30-июндиз Даггосуниверситетдин биологиядин факультетдин советдин заседанидал и факультетдин агъсакъал Агъалар Аливердиеваз 90 йисан юбилей мубаракна.
Биологиядин факультетдин декан Рустам Халилова ДГУ-дин ректордин патай Тебрикдин чар кIелна. Тебрикар ботаникадин кафедрадин заведующий Мадина Мегьамедовади ва маса муаллимрини авуна.
Къейд ийин, Агъалар Абутрабович Аливердиев Дагъустанда биологиядин илимрин сад лагьай доктор(1963), профессор (1964) я.
ДАССРдин илимдин лайихлу деятель (1992), “Холод” тIвар алай Международный академиядин биотехникадай член-корреспондент (1996), Нью-Йоркдин академиядин академик (1997), Россиядин высший школадин лайихлу работник (1999) Агъалар Аливердиева 1955-йисалай Даггосуниверситетда кIвалахзава.
Биологиядин илимрин патриарх лугьузвай и кас ДГУ-да биологиядин факультет арадал гъайибурукай сад я. Ина ада са шумуд кафедрадизни регьбервал гана.
Биологиядин илимрин патриарх А.Аливердиева ДГУ-дин патав физиологиядин школани арадал гъана. Адан бинедаллаз 1975-йисуз инсанрин ва гьайванрин физиологиядай Россиядин вузрин муаллимар патал физиологиядай гатун школа тешкилнавай. Университетда инсанрин ва гьайванрин физиологиядин, физиологиядин ва дарвинизмдин, биохимиядин ва биофизикадин, физиологиядин ва ихтиологиядин кафедраяр арадал атуникни А.Аливердиеван еке пай ква.
Ам 150-далай гзаф илимдин кIвалахрин, гьа жигьетдай яз 20-далай гзаф монографийрин, учебникрин автор я. 2010-йисуз пешекарар ва студентар патал туькIуьрнавай учебникдиз тешпигьди бажагьат ава.
Шагь Шагьов
