РД-дин лайихлу муаллим, РФ-дин сифтегьан пешекарвилин образованидин Гьуьрметлу къуллугъчи лагьай тIварарин, са жерге гьуьрметдин грамотайрин сагьиб, педагогвилин зегьметдин ветеран, Лукьман Шихрагьимович Идрисов къунши районрани гзафбуруз тежрибалу пешекар, туькIвей хизандин кьил, жегьилрин насигьатчи, мугьманперес кас яз чида. ГьикI лагьайтIа, ада тамам 22 йисуз (1990-2013) Ахцегьрин 29-нумрадин ПТУ-дин директорвиле кIвалахна. Ахцегьрин чилел и училище ачухуник кьил кутурди гьам я.
Ахцегьрин 1-нумрадин юкьван школа куьтягьай Л.Идрисован вилик гележегдин пеше хкягъунин месэла акъвазнач, ада ам виликамаз тайинарнавай. Вичин мурад кьилиз акъудун яз Лукьмана 1962-1967-йисара Пятигорскдин къецепатан чIаларин институт агалкьунралди куьтягьна. Вуз куьтягьайдалай кьулухъ ам кIвалахиз Рутул райондиз рекье туна. 1969-1971-йисара Дагъустандин просвещенидин министерстводи инай Лукьман Шихрагьимович Индиядин Нью-Дели шегьердиз советрин экспертрин дестедихъ галаз яргъал вахтунин командировкадиз ракъурна. Дерин чирвилер авай пешекарди Нью-Делида ингилис чIалан таржумачивиле кIвалахна.
А девирда, 1972-йисуз, ада Дагъустанда сифте яз Волга ГАЗ-24 маркадин автомашин къачунай. Къецепатан уьлкведа кIвалахай адаз и улакь къачудайла кьезилвилер авай. Дагъустандиз хтайдалай кьулухъ Л.Идрисоваз Ахцегьрин 3-нумрадин школадин директорвиле кIвалахун кьисмет хьана. Ина кIелунринни тербиядин кIвалахдин дережа хкажунин, аялрин диде-бубайрихъ галаз сих алакъаяр хуьнин месэлайриз ада иллаки гзаф фикир гузвай. Школа кIвенкIвечибурун жергеда гьатна.
1990-йисуз Лукьман муаллимди Ахцегьа ПТУ (29-нумрадин) арадал гъана ва вич анин кьиле акъвазна. Ина са куьруь вахтунда техникадинни алатрин мягькем база арадал гъана, инженервилинни педагогвилин коллектив кIватIна. Самур дередин районрин жегьилриз 29-нумрадин ПТУ-да пешекарвал къачудай мумкинвал хьана. Аялриз стипендияни гузвай, абур общественный кIвалахрални машгъул жезвай.
— Лукьман Шихрагьимовича училищедин директорвиле кIвалахай йисар за анжах хуш келимайралди рикIел хкизва. Оркестрдихъ вичин дирижер жедайвал, чнани ам гьа и тегьерда, яни гьар са хъсан кардик кьил кутазвайди ва башчи яз гьиссзавай. Гьамиша куьмекдиз къвез гьазур ада зазни, а вахтунин жегьил муаллимдиз, тежрибадин меслятар гузвай ва вичин муаллимвилин чирвилер жумартвилелди пайзавай, — къейдна училищедин физрук Назир Ханагьмедова.
И цIарарин автордизни са шумуд йисуз Лукьман Шихрагьимовичахъ галаз училищеда кIвалахун кьисмет хьана. А йисара за чкадин газетдин жавабдар секретардин къуллугъдал кIвалахиз училищеда урус чIаланни литературадин ва рахунин культурадин тарсар гузвай. РикIел алама, Советрин чIехи уьлкве чкIанвай четин йисара училищеда кIелунринни тербиядин кIвалахдиз кьетIен фикир гун яз, гьар пакамахъ тарсар башламишдалди вилик линейкаяр тешкилзавай ва анал пис ва хъсан кIелзавайбур къейдзавай. КIелзавайбурузни муаллимриз училищедин сергьятра пIапIрусар чIугун кIевелай къадагъа тир.
Алай вахтунда Ахцегьа 29-нумрадин ПТУ-дин ериндал хуьруьн майишатдин 2-нумрадин колледж хьанва ва Лукьман муаллимди ина ингилис чIалан муаллимвиле кIвалахзава.
Лукьман Шихрагьимовича вичин веледарни Ватандиз вафалу инсанар яз тербияламишнава. Хва Завира РагъэкъечIдай патан халкьарин чIаларин Каирдин университет къизилдин медалдалди куьтягьнава. Руш Нателлади ДГТУ-дин экономикадин кафедрадин заведующийвиле кIвалахзава.
Нариман МАМЕДОВ
