Мукьвара Герейханован хуьруьн стадиондал вичин къуллугъдин везифаяр тамамардайла игитвилелди телеф хьайи милициядин старшина, “ВикIегьвилин” ордендин сагьиб Роберт Къазиагьмедов рикIел хкунин лишан яз футболдай республикадин 8-турнир кьиле фена. Ам ачухунин мярекатдал райондин администрациядин кьилин заместитель Саид Темирханов, РД-дин МВД-дин векил, полициядин полковник Сейфедин Эмирбегов, Герейханован хуьруьн администрациядин кьил Руслан Алдыров, райондин спортдин ва физкультурадин комитетдин председатель Надир Эфендиев, школадин директор Мадина Гьажимурадова, спортдин ветеран Къурбан Къурбанов рахана, кьегьал хцин экуь къамат рикIел хкана.
Къейд.
Р. А. Къазиагьмедов 1973-йисан 29-июндиз Герейханован хуьре дидедиз хьана. Ада хуьруьн юкьван школа, “Юждаг” университетдин экономический факультет, 2007-йисуз Россиядин МВД-дин Краснодарда авай университетдин Махачкъаладин филиалдин юридический факультет акьалтIарна.
Р.Къазиагьмедова 1990-1991-йисара “Герейхановский” совхозда рабочийвиле кIвалахна, 1991-1993-йисара Советрин Армиядин жергейра къуллугъна.
1994-2001-йисара Дербент шегьердин ветеринарный управленидин шофер яз, 2001-2002-йисара МВД-дин Сулейман-Стальский РОВД-дин патрульно-постовой къуллугъдин милиционер-стажер яз, 2002-йисан 1-январдилай вичин уьмуьрдин эхиримжи йикъалди (2008-йисан 19-июндалди) РОВД-дин милициядин патрульно-постовой къуллугъдин отделенидин милиционер яз кIвалахна.
2009-йисан 30-августдиз акъудай Указдалди Роберт Абидинович Къазиагьмедоваз телеф хьайидалай кьулухъ “ВикIегьвилин” орден гана.
Р.Къазиагьмедован тIвар Герейханован хуьре са куьчедиз ва хуьруьн юкьвал алай стадиондиз ганва.
Санлай къачурла, турнирда райондин хуьрерай атанвай 10 командади иштиракна. Абурун арада къизгъин акъажунар кьве гьафтеда давам хьана.
Р.Къазиагьмедован турнирда гъалиб хьайи Агъа-СтIалрин командадив райадминистрациядин кьилин 1-заместитель Лацис Оруджева гъиляй-гъилиз къведай Кубок, медалар, дипломар ва пулдин пишкеш вахкана.
2 ва 3-чкаяр кьур командаярни медалриз, дипломриз ва пишкешриз лайихлу хьана.
КIвалахда жезвай агалкьунрай ва Р.Къазиагьмедован турнир хъсан тешкиллувал аваз кьиле тухунай Надир Эфендиевав РД-дин МВД-дин министр Абдурашид Мегьамедован патай Гьуьрметдин грамотани вахкана.
Хазран Кьасумов
